Ֆրանսիացի լրագրողները վստահ են Ալիևների դեմ դատը շահելու մեջ

Ադրբեջանի իշխանությունը Ֆրանսիայի France2 հեռուստաալիքի և նրա աշխատակից լրագրողներ Էլիզաբեթ Լուսետի ու Լորան Ռիչարդի դեմ դատական գործ է հարուցել այն բանի համար, որ հեռուստաալիքի Gash Investigation ծրագրի սեպտեմբերի սկզբին հրապարակված հաղորդման մեջ Ադրբեջանի նախագահ Իլհամ Ալիևն անվանվել է բռնակալ, դիկտատոր, իսկ Ադրբեջանը' բռնապետություն:

Le Figaro թերթը հայտնել է, որ դատական հայցը ներկայացվել է ֆրանսիական Nanter դատարան' Ալիևների կողմից վարձված ֆրանսիացի փաստաբան Իրվյե Պարդոյի կողմից: Փաստաբանը հայտնել է, որ Ալիևները դատարանից պահանջում են պատժել հեռուստաալիքին, քանի որ ծրագիրը պատրաստելիս լրագրողները «կողմնակալություն են ցուցաբերել» և «անբարյացակամություն ու հետին նպատակ» դրսևորել:

Դատական հայցի հետ կապված' լրագրողներ Էլիզաբեթ Լուսետն ու Լորան Ռիչարդը թերթի հետ զրույցում համոզմունք են հայտնել, որ դատն իրենք են շահելու, քանի որ իրենց հաջողվելու է քաղաքացիական կազմակերպությունների աջակցությամբ ժխտել Ադրբեջանի իշխանության այդ պնդումները:

Թերթը հիշեցրել է, որ հեռուստաալիքի աշխատակից Էլիզաբեթ Լուսետը Փարիզում Ադրբեջանի բացած ցուցահանդեսում հարցեր է ուղղել Ադրբեջանի առաջին տիկին Մեհրիբան Ալիևային այն մասին, որ «հանդուրժողականության վայր» ներկայացվող Ադրբեջանում մեծ թվով քաղաքական բանտարկյալներ կան, սակայն, թիկնապահները հեռացրել են նրան Ալիևայի մոտից, իսկ վերջինս էլ խուսափել է պատասխանել իր հարցին:

Հաղորդման ժամանակ հարցազրուցներ են հեռարձակվել Ադրբեջանում մարդու իրավունքների ակտիվիստների և վարչակարգին ընդդիմադիր քաղաքական գործիչների հետ:

«Ադրբեջանում մենք մեր գործն էինք կատարում և այդ պատճառով Ադրբեջանի իշխանությանը չի հաջողվի շահել այս դատական գործը: Դատարանում մեզ կպատշտպանեն «Լրագրողներ առանց սահմանների», Amnesty International կազմակերպությունները ևս», -ասել են նրանք:

Le Figaro-ն հիշեցրել է, որ Ֆրանսիայում նման դատական պնդում Rue 89 կայքի դեմ ներկայացվել էր 2011 թվականին Ուզբեկստանի նախագահի դուստր Լոլա Քարիմովային «բռնապետի դուստր» և «կեղտոտ փողեր լվացող» անվանելու համար: Այն ժամանակ Փարիզի գերագույն դատարանի 17-րդ պալատը մերժել էր հայցը: