Ռոբերտ Քոչարյանին իրականում շատ բաներ են խանգարում

ՀՀ երկրորդ նախագահ Ռոբերտ Քոչարյանի՝ մեծ քաղաքականություն վերադառնալու հավանականությունն իրականում ոգևորել է մի շարք քաղաքական գործիչների և նույնիսկ՝ հույսով արել: Սա, իհարկե, ոչ բացահայտ, քողարկված կերպով, սակայն նույնիսկ նրանց մեկնաբանություններն այդ առթիվ, մեղմ ասած, մատնում են նրանց: Օրինակ, ՀՀ կառավարության աշխատակազմի ղեկավար-նախարար Դավիթ Հարությունյանը՝ լրատվամիջոցներից մեկին մեկնաբանելով Ռոբերտ Քոչարյանի հնարավոր կապը Վարդան Օսկանյանի կողմից ստեղծվելիք կուսակցության հետ, ասել է՝ եթե երկրորդ նախագահն իսկապես ցանկանար վերադառնալ մեծ քաղաքականություն, ապա ոչինչ չէր խանգարում նրան ինքնուրույն հաստատեր դա, բացահայտ հայտարարեր այդ մասին, այլ ոչ թե` աներ այլ կուսակցությունների միջոցով:

Այ այստեղ է, որ պետք է հակադարձեմ Դավիթ Հարությունյանին. ես համոզված եմ, որ երկրորդ նախագահին իրականում շատ բաներ են խանգարում իր վերադարձի մասին բացահայտ հայտարարելու համար: Նախ, Ռոբերտ Քոչարյանը փորձառու ու բավականին խելացի գործիչ է և շատ լավ գիտակցում է, որ իր վերադարձի մտադրությունը ինքնուրույն հաստատելու դեպքում հասարակության կողմից ինքը կունենար գրեթե զրոյական աջակցություն, հետևաբար, նրա քաղաքական գործունեությունը դեռ չվերսկսված՝ միանգամից կտապալվեր: Քոչարյանը, վստահ եմ, շատ լավ է գիտակցում, որ ժողովուրդն իրեն, մեղմ ասած, չի սիրում և դեռ չի մոռացել իր արածները: Իհարկե, մեր ժողովրդի մի հատվածը սովորություն ունի երբեմն հիշողության կորուստ արձանագրելու և կարևոր բաները մոռանալու, ինչպես օրինակ 2008-ին մոռացան Լևոն Տեր-Պետրոսյանի արածները և գնացին նրա հետևից, սակայն Քոչարյանի այդ ժամանակը դեռ չի եկել, նրա «գործերը» դեռ չեն մոռացվել, միգուցե էլի ինչ-որ ժամանակ է պետք, որ անցնի:

Ռոբերտ Քոչարյանն ամեն ինչ լավ է հաշվարկել, այլ կերպ չէր էլ կարող լինել, չէ՞ որ նա փորձառու է և խելացի, ինչն անվիճելի է: Հետևաբար, երկրորդ նախագահը մեծ քաղաքականություն կփորձի վերադառնալ միայն կուսակցությունների միջոցով, իր վստահելի մարդկանց, իր մարդկանց միջոցով, և այդ մարդկանցից է՝ Վարդան Օսկանյանը:

Ի դեպ, տարօրինակ չէ, որ Դավիթ Հարությունյանը զգուշորեն պաշտպանում է Ռոբերտ Քոչարյանին, չէ՞ որ հենց երկրորդ նախագահի օրոք է նա զբաղեցրել երկրի արդարադատության նախարարի պաշտոնը:

Կարեն Վարդանյան