Շավարշ Քոչարյան. Հայաստանի կողմից ԼՂՀ-ն ճանաչելու գործընթաց չկա

Կառավարության նիստից հետո լրագրողների հետ հանդիպման ժամանակ ՀՀ արտաքին գործերի փոխնախարար Շավարշ Քոչարյանն ասաց, որ փոխօգնության պայմանագիրը գտնվում է Հայաստանի գերատեսչությունների համաձայնեցման փուլում.

«Վերջնական տեսքի բերելը պայմանավորված է նրանով, որ վերջնական տեսքի բերենք տեքստը, համաձայնեցնենք, ստորագրվի, որից հետո կարող ենք խոսել վավերացման մասին»,- ասաց Քոչարյանը:

Փոխնախարարը նշեց, որ միշտ օրակարգում եղել է ԼՂՀ-ն բանակցային կողմ դարձնելը, և այս վերջին իրադարձությունները ևս մեկ անգամ ընդգծում են, որ Ղարաբաղի ներգրավվածությունն այլընտրանք չունի՝ թե՛ այն առումով, որպեսզի կանխվեն նմանատիպ ապագա սադրանքները, թե՛ բուն բանակցային գործընթացում առաջընթաց արձանագրելու տեսանկյունից»:

Հարցին, թե երբ Հայաստանը կսկսի ԼՂՀ անկախությունը ճանաչելու գործընթացը, Քոչարյանն ասաց, որ այսօր Հայաստանի կողմից այդպիսի գործընթաց նախաձեռնված չէ, իսկ պայմանագիրն այն փաստաթուղթն է, որն ընդգծում է՝ Հայաստանի հարաբերությունները ԼՂՀ հետ իրավահավասարության վրա են:

Փոխարտգործնախարարի խոսքով՝ Ռուսաստանի արձագանքը միջնորդի արձագանք էր և Ռուսաստանը երկակի դրության մեջ էր, քանի որ մի կողմից նա Մինսկի խմբի միջնորդ է, մյուս կողմից՝ հաշվի է առնվել, որ գործողությունները ոչ թե Հայաստանի, այլև Լեռնային Ղարաբաղի դեմ էին: Ինչ վերաբերում է մնացած երկրների արձագանքին՝ Ղազախստանի, Բելոռուսի, ըստ փոխարտգործնախարարի, իրենք ակնկալել են չեզոք մոտեցում: