Խմբագրական. Մեդվեդևը պարզապես ստում է

Փաստորեն Դմիտրի Մեդվեդևը բավականին նեղացկոտ է. «վառված» մնաց Սերժ Սարգսյանի «ապտակից», բայց չկարողացավ տեղում պատասխանել, թողեց գնաց ու հավանաբար դեպրեսիվ ու «մանթո» վիճակում որոշեց իր վրեժը հանել՝ ռուս-ադրբեջանական դարավոր բաերկամության մասին Թվիթերում ստատուս գրելով: Զգում եք չէ՞ հզորությունը՝ ռուս-ադրբեջանական դարավոր բարեկամություն: Թե այդ ինչ մաթեմատիկական սկզբունքներ ու նոր համակարգեր է կիրառում Մեդվեդևը, որ 1918-ին ստեղծված և ընդամենը 98 տարի գոյություն ունեցող Ադրբեջանը դառնում է դարավոր՝ հայտնի չէ:

Օրինակ, պատմությունից գիտենք, որ հին աշխարհում շումերները կիրառում էին թվաբանության վեցական համակարգ, իսկ հետո ստեղծվեց տասնական համակարգը, որը կիրառվում է մինչ օրս: Չի բացառվում, որ Ռուսաստանում Մեդվեդևի բարձր հովանու ներքո մաթեմատիկոսները մշակում են թվաբանության մի նոր համակարգ, ըստ որի՝ այո, 98 տարին մի քանի դար է, հետևաբար ռուս-ադրբեջանական բարեկամությունն էլ կարող է լինել դարավոր:

Սա ընդամենը ենթադրություն է և տարբերակներից մեկը: Մյուս տարբերակը այն է, որ Մեդվեդևը ուղղակի պատմություն չգիտի, թերուս է: Բայց ես այդ տարբերակին մի տեսակ հակված չեմ և կարծում եմ, որ ՌԴ վարչապետը լավ էլ ուսյալ ու կրթված է ու շատ լավ էլ պատմություն գիտի, ուստի ինձ ավելի հավանական է թվում երրորդ տարբերակը:

Իսկ երրորդ տարբերակը այն է, որ Մեդվեդևը ամեն ինչ իմանալով պարզապես ստում է, պարզապես նա ակնկալում էր, որ հայկական կողմը կշարունակի գլուխը կախ հանդուրժել «դաշնակցի» երկերեսանիությունն ու անազնիվ քաղաքականությունը: Բայց ակնկալիքները կարծես թե չեն արդարանում և դա արդեն կարող է մտահոգիչ լինել ՌԴ իշխանությունների համար, ուստի միտումնավոր ստելով մեր թշնամուն «կոմպլիմենտ» անելը ըմբոստացող հայերին ամենարմար պատասխանը կարող էր լինել այս պահին, նաև միգուցե ակնարկ, որ եթե պետք լինի՝ ավելի կջերմացնեն հարաբերությունները մեր թշնամու հետ:

Կարեն Վարդանյան