Ի՞նչ սպասել Ալիև-Էրդողան հանդիպումից

Ստամբուլում ապրիլի 14-15-ը տեղի կունենա Իսլամական համագործակցության կազմակերպության 13-րդ գագաթաժողովը, որի շրջանակում այսօր Ստամբուլում կկայանա Թուրքիայի նախագահ Ռեջեփ Թայիփ Էրդողանի և Ադրբեջանի նախագահ Իլհամ Ալիևի հանդիպումը։ Թուրքագետ Լևոն Հովսեփյանը ԼՈՒՐԵՐ.com-ի հետ զրույցում նշեց՝ սա ոչ թե երկկողմ այց է, այլ գագաթաժողովի շրջանակում։ Թուրքագետի կարծիքով՝ Ադրբեջանը որոշակի սպասելիքներ ունի Թուրքիայից և հանդիպման ժամանակ սահմանին ստեղծված իրավիճակի վերաբերյալ քննարկումներ և հարցադրումներ կլինեն։

«Ստեղծվել է բարդ իրավիճակ։ Կարծում եմ՝ որոշ հարցադրումներ, քննարկումներ կլինեն ստեղծված իրավիճակի շուրջ։ Ադրբեջանը Թուրքիայից սպասելիքներ կարող է ունենալ, Թուրքիան էլ Ադրբեջանից։ Սպասելիքները կարող են տարբեր լինել՝ քաղաքական, ռազմաքաղաքական, դիվանագիտական և այլն»,- ասաց Լ.Հովսեփյանը։

Մեր զրուցակցի խոսքով՝ սահմանին Ադրբեջանը սադրանքների գնում է՝ անկախ հանդիպումներից. «Այնպիսի իրավիճակ է, որ Ադրբեջանը ամեն պահի էլ կարող է սադրանքների գնալ, ռիսկայնությունը միշտ էլ կա։ Հաշվի առնելով նաև այն, որ Թուրքիան բավական սադրող, հրահրող կեցվածք ընդունեց, ապա չի բացառվում, որ Թուրքիան այդ քաղաքական գիծը կշարունակի»։

Թուրքագետը նշեց, որ պաշտոնական Անկարայի հրահրիչ քաղաքականությունը դրսևորվում էր նաև տեղեկատվական դաշտում։ «Անգամ տեղեկատվական գրոհ էր իրականացվում, սադրիչ վերնագրերով, հակահայկական տրամադրություններ էին ստեղծվում»,- շեշտեց Հովսեփյանը։ Չորսօրյա պատերազմի վերաբերյալ Թուրքիայում ապրող ազգային փոքրամասնությունների տեսակետների վերաբերյալ Լևոն Հովսեփյանն ընդգծեց, որ մենք տեսանք Քրդամետ ժողովուրդների դեմոկրատական կուսակցության դիրքորոշումը, որը քննադատեց Ադրբեջանի ագրեսիվ գործողությունները։

«Սա ընդգծված մոտեցում էր և էականորեն տարբերվող՝ Անկարայում հնչող մյուս հայտարարություններից։ Մնացած փոքրամասնությունների մասով չեմ կարող ասել, որովհետև նման բան չի եղել»,- հավելեց թուրքագետ Լևոն Հովսեփյանը։