Սեֆիլյանի հերթական «ռասկռուտկան»

Հետաքրքիր է, թե որտեղից մի մարդու, ով քառօրյա պատերազմի սկզբից մինչ օրս գոնե մեկ անգամ առաջնագծում չի եղել, տեղեկություններ այն մասին, թե որքան տարածքային կորուստներ ունենք մենք: Եվ զավեշտալին այն է, որ Ժիրայր Սեֆիլյանն իր այդ ունեցած «տեղեկությունները» քառակուսի մետրով է չափում ու հաղորդում, որովհետև եթե ասեր' 7 քառակուսի կիլոմետր' միգուցե այդքան տպավորիչ չլիներ, իսկ այսպես ստացվեց 7 միլիոն քառակուսի մետր... Միլիոնը արդեն այլ հնչողություն ունի, միլիոն բառն արդեն կապահովի «սկանդալը», Սեֆիլյանի հերթական «ռասկռուտկան», ինչպես նաև կարող է գրավել ադրբեջանական լրատվամիջոցների ուշադրությունը ու էլ ավելի գրգռել ադրբեջանցիների հիվանդ երևակայությունը. դա էլ երևի մոտ ապագայում կտեսնենք:

Այսպիսով, «7 միլիոն ք/մ կորուստ» և «համազգային մոբիլիզացիա» հայտարարելու պահանջ, այսինքն' համազգային խուճապ. ահա այն ազդակները, որոնք իր ասուլիսի միջոցով փորձեց հանրությանը հասցնել Ժիրայր Սեֆիլյանը: Եվ ցավալին այն է, որ հանրության մեջ կա մի փոքր հատված, ով նման դեպքերում գերադասում է հավատալ յուրաքանչյուր նմանատիպ անհիմն ու վստահություն չներշնչող հայտարարության, քան թե իր երկրի բանակի ղեկավարությանը: Սեֆիլյանը մեղադրում է իշխանություններին ճշմարտությունը թաքցնելու մեջ, սակայն չկա որևէ երաշխիք, որ Սեֆիլյանի ասածների մեջ գոնե ճշմարտության ինչ-որ տոկոս կա:

Իհարկե, Ժիրայր Սեֆիլյանը կարող էր էլ ավելի «սկանդալային» բան մտածել' ասենք քառակուսի մետրի տեղը տարածքը հաշվեր քառակուսի միլիմետրով՝ այդ դեպքում էլ ավելի «սկանդալային» կստացվեր նրա հայտարարությունը, քանի որ միլիոնը միլիարդ կդառնար:

Կարեն Վարդանյան