Պարզ չէ՝ Սարիկ Անդրեասյանի «Երկրաշարժ» ֆիլմին, որ ֆիլմը կփոխարինի

Երեկ հայտնի դարձավ, որ «Օսկար» մրցանակաբաշխության «Լավագույն օտարալեզու ֆիլմ» անվանակարգի ընդլայնված ցանկից դուրս է մնացել Սարիկ Անդրեասյանի «Երկրաշարժ» ֆիլմը, որը պատմում է 1988թ. Սպիտակի աղետալի երկրաշարժի մասին:

Հիշեցնենք, որ այդ ցանկում ընդգրկվում են աշխարհի շուրջ 85 երկրներից ֆիլմեր, որոնցից կընտրվի միայն լավագույն 5-ը:
Նշենք, որ Հայաստանը դեռևս չի կորցրել մասնակցության իր հնարավորությունը և Օսկար մրցանակաբաշխությանը կարող է մասնակցել մեկ այլ ֆիլմով:

ԼՈՒՐԵՐ.com-ի թղթակցի հետ զրույցում Հայաստանի ազգային կինոակադեմիայի գլխավոր քարտուղար, կինոքննադատ Րաֆֆի Մովսիսյանը նշեց, որ Հայաստանը պաշտոնապես դեռ պատասխան չի ստացել:

«Սարիկ Անդրեասյանի ֆիլմի հետ կապված մենք ուղարկել ենք լրացուցիչ փաստաթղթեր և դեռ չենք ստացել վերջնական պատասխան ամերիկյան քննադատներից: «Երկրաշարժ» ֆիլմը համատեղ արտադրություն է, իսկ հայերի մասնակցությունը պայմանավորված է 88-ի դեպքերով: Երբ կունենանք վերջնական պատասխանը, այդ ժամանակ էլ Հայաստանի ազգային կինոակադեմիան որոշում կկայացնի՝ ինչ անել»,- ասաց նա:

Իսկ, թե Սարիկ Անդրեասյանի ֆիլմին, մասնավորապես, որ ֆիլմը կփոխարինի, մեր զրուցակիցը նշեց՝ Խորհրդի առաջին նիստի ժամանակ Սարիկ Անդրեասյանի ֆիլմի հետ ներկայացվել էր ևս երկու ֆիլմ. «Մեկը Ջիվան Ավետսիյանի «Վերջին բնակիչը» ֆիլմն էր, մյուսը՝ Դավիթ Սաֆարյանի «Տաք երկիր, ցուրտ ձմեռը»: Հավանաբար քննարկումներն այս երկու ֆիլմերի շուրջ կընթանան»,- ասաց նա: