Երևանում կայացավ «Մարիա դե Բուենոս Այրես» օպերա տանգոյի պրեմիերան

Աստոր Պիացոլայի «Մարիա դե Բուենոս Այրես» օպերա տանգոյի պրեմիերան տեղի ունեցավ դեկտեմբերի 8-ին Ալ. Սպենդիարյանի անվան օպերայի և բալետի ազգային ակադեմիական թատրոնում։ Օպերա տանգոն կայացավ ՀՀ մշակույթի նախարարության աջակցությամբ։

Ներկայացման հատուկ հյուրն էր աշխարհահռչակ բանդոնեոնահար Կարլոս Բուոնոն, ով աշխատել և համագործակցել է Պիացոլայի հետ։

Ներկայացման բեմադրող ռեժիսոր Արմեն Մելիքսեթյանը, խոսելով բեմադրության մասին, ասաց, որ չի կարող կարծիք հայտնել, մինչև այն չներկայացվի հանդիսատեսի դատին։ «Մինչև ժողովուրդը չնայի և իր գնահատականը չտա, իմ կարծիքը գրոշի արժեք չունի»,- «Արմենպրես»-ի հետ զրույցում ասաց Մելիքսեթյանը և հավելեց, որ ընտրել է հենց այս գործը, քանի որ իր կարծիքով տանգոն շատ հոգեհարազատ է իրեն և ընդհանրապես մեր ազգին։

«Տանգոյի ռիթմերը, երաժշտությունը՝ կրակոտ, շատ մոտ է մեզ և երևի հենց դրա համար եմ ընտրել այս օպերա տանգոն»,- հավելեց ռեժիսորը։

Նրա խոսքով՝ կազմը ընտրվել է տարբեր թատրոններից՝ օպերային թատրոնից, համազգային թատրոնից և կան երգիչներ, ովքեր նրա ուսանողներն են՝ երաժշտական թատրոնի դերասաններ են, ինչպես նաև կան ուսանողներ, ովքեր դեռ սովորում են և շուտով պետք է ավարտեն։

«Ներկայացումը շատ խառը և հետաքրքիր սյուժե ունի։ Բուն գաղափարը կայանում է նրանում, որ ներկայացնում ենք Մարիա դե Բուենոս Այրես կնոջ կերպարը և ամբողջ տանգոյի պատմությունը։ Ցույց է տրվում, թե ինչպես է տանգոն առաջացել։ Շատ մանրամասն չեմ ցանկանում պատմել, որպեսզի հետաքրքրի լինի։ Ասեմ, որ ընթացքում իբր հեղափոխություն է լինում 1973 թվականին, ընդհանրապես փակվում են բոլոր այն վայրերը, որտեղ մարդիկ տանգո էին պարում։ Հետո վերածնվում է, և մենք ունենում ենք տանգո նուեվո, այսինքն նոր շունչ ստացավ տանգոն։ Սա է սյուժեն։ Կարելի է ասել՝ մյուզիքլայան է, որտեղ մենք, և՛ պարելու ենք, և՛ երգելու, և՛ իհարկե դերասանական խաղ է լինելու։ Մեզ համար մեր հյուրի՝ Կարլոս Բուոնոյի կարծիքն էր շատ կարևոր, ով ասաց, որ մենք կարողանում ենք արտահայտել տանգոյի ոգին։ Նա արդեն մեկ շաբաթ է՝ գտնվում է Հայաստանում և բոլոր փորձերին պարտադիր մասնակցում է իր բանդոնեոնով»,- ասաց ռեժիսորի ասիստենտ, ներկայացման մասնակից Արա Ասատուրյանը։

Ներկայացումը բեմադրվել է Նոր երաժշտական թատրոնի աջակցման հիմնադրամի համատեղ ջանքերով։

«Մարիա դե Բուենոս Այրես» օպերա տանգոյի պրեմիերային ներկա էր նաև ՀՀ առաջին տիկին Ռիտա Սարգսյանը։