Ծանրորդ Սոնա Պողոսյանը դարձավ Եվրոպայի առաջնության փոխչեմպիոն

Ռիոյի ամառային Օլիմպիական խաղերի մասնակից ծանրորդ Սոնա Պողոսյանը ծանրամարտի Եվրոպայի մինչև 20 տարեկանների առաջնությունում նվաճեց արծաթե մեդալ:

Պողոսյանը պոկում վարժությունում բարձրացրեց 96 կգ և գրավեց երրորդ տեղը' նվաճելով բրոնզե մեդալ, իսկ հրումում բարձրացնելով 122 կգ արժանացավ փոքր արծաթե մեդալի: Երկամարտի 218 կգ արդյունքով Սոնա Պողոսյանը դարձավ Եվրոպայի առաջնության փոխչեմպիոն:

Ծանրամարտի Եվրոպայի մինչև 20 և 23 տարեկանների առաջնություններում Հայաստանը ներկայացնում են, ընդհանուր առմամբ, 13 մարզիկներ: Մինչև 20 տարեկանների առաջնությունում կմրցեն 62 կգ Դավիթ Գասպարյանը, 77 կգ Դավիթ Հովհաննիսյանը, 85 կգ Հակոբ Մկրտչյանը, 94 կգ Սամվել Գասպարյանը, 105+ կգ Սիմոն Մարտիրոսյանը:

Աղջիկների պայքարում իրենց ուժերն են չափում 75 կգ քաշային Սոնա Պողոսյանը և 75+ Արփինե Դալալյանը:

23 տարեկանների պայքարում մրցասպարեզ են դուրս գալիս՝ 56 կգ Սմբատ Մարգարյանը, 62 կգ Գևորգ Բաղդասարյանը, 77 կգ Ռազմիկ Օսեթյանը, 94 կգ Կարուշ Ղուկասյանը և 105 կգ Մկրտիչ Մկրտչյանը:

Իզաբելա Յայլյանն արդեն հինգերորդ տեղն է գրավել առաջնությունում:

Առաջնություններն այս տարի անցկացվում են իսրայելական Էյլաթ քաղաքում դեկտեմբերի 2-10-ը: