Ալիևի հետ հանդիպման մասին խոսելն անիմաստ է

«Հայկական կողմը բազմիցս նշել է, որ ընդունում է բոլոր այն պայմանավորվածությունները, որոնք ձեռք են բերվել ինչպես Սանկտ Պետերբուրգում, այնպես էլ Վիեննայում, սակայն մյուս կողմը՝ Ադրբեջանը, դրանք, փաստորեն, մերժում է»,-

ԱԺ ճեպազրույցների ժամանակ հայտարարեց ՀՀԿ խմբակցության ղեկավար Վահրամ Բաղդասարյանն՝ անդրադառնալով Սարգսյան-Ալիև հնարավոր հանդիպմանը:

Նրա կարծիքով՝ նման պայմաններում խոսել հաջորդ հանդիպման մասին, պարզապես ժամավաճառություն կլինի, քանի որ այս ընթացքում ձեռք բերված պայմանավորվածություններն առայժմ կյանքի չեն կոչվել: Պատասխանելով հարցին՝ արդյոք հայկական կողմը հրաժարվո՞ւմ է Ադրբեջանի հետ հերթական հանդիպումից, հաշվի առնելով, որ ԵԱՀԿ մասնակից երկրների արտաքին գործերի նախարարների 23-րդ խորհրդում ՀՀ ԱԳ նախարար Էդվարդ Նալբանդյանն ասել էր, որ Ադրբեջանը համառորեն հրաժարվում է Վիեննայում, Սանկտ-Պետերբուրգում, ինչպես նաև նախկինում ձեռք բերված պայմանավորվածություններից, պատգամավորը նշեց, որ, բնականաբար, չի կարելի անընդհատ պայմանավորվածություններ ձեռք բերել և դրանք խախտել:

«Պայմանավորվածությունները պետք է կատարենք, նոր գնանք առաջ»,-ասաց նա և տեղին չհամարեց այն դիտարկումը, թե զուգահեռ գործընթաց կարելի է սկսել:

Հարցին՝ եթե պայմանավորվածությունները չկատարվեն, կարո՞ղ ենք ասել, որ նախագահ Սերժ Սարգսյանը չի գնա հանդիպման, Վահրամ Բաղդասարյանը պատասխանեց, որ որևէ հանդիպումից հայկական կողմը չի խուսափել, բայց եթե այդ հանդիպումների ժամանակ ձեռք բերված պայմանավորվածությունները կյանքի չեն կոչվում, ապա նոր հանդիպման մասին խոսելն ուղղակի անիմաստ է: