Թալիշում կատարված վայրագությունները արմենաֆոբիայի փաստեր են. ԼՂՀ օմբուդսման (տեսանյութ)

Թալիշում կայացած մամուլի ասուլիսի ժամանակ Լեռնային Ղարաբաղի մարդու իրավունքների պաշտպան Ռուբեն Մելիքյանը ներկայացրել է առաջին միջանկյալ զեկույցը, որը վերաբերում է ապրիլյան դեպքերից հետո քաղաքացիների և զինվորականների նկատմամբ կատարված ռազմական հանցագործություններին:

«Ընթացիկ զեկույցում ամենակարևոր տարրը եղել է հայատյացության հարցը՝ արմենաֆոբիան: Փորձել ենք ներկայացնել տարբեր տարրեր, որոնք վերաբերվում են հայատյացությանը՝ Ադրբեջանի պետական քաղաքականությունում: Մենք մի քանի փաստահավաք այցեր ենք իրականացրել, որտեղ դաժանություններ են տեղի ունեցել և որոնց վերաբերյալ մենք խոսում ենք: Տասնյակ ականատեսների հետ հանդիպումներ են եղել, որոնք անմիջական մասնակցություն են ունեցել ռազմական գործողություններին, ինչպես նաեւ այն մարդկանց հետ, որոնք քաղաքացիական բնակչության հետ կապված՝ մարդու իրավունքների խախտումներին են ականատես եղել»,-ասաց նա և հավելեց, որ հարցումներ են արվել նաև պետական մարմիններին՝ ապրիլյան իրադարձությունների վերաբերյալ: Ունեցել են բազմաթիվ խորհրդակացություններ ռազմական, բժշկական մասնագետների հետ, և շարունակել են բաց աղբյուրների մշտադիտարկումները:

Օմբուդսմանի խոսքով՝ զեկույցում անդրադարձել են ապրիլյան դեպքերի ընթացքում ադրբեջանական կողմից իրականացված խոշտանգումներին, դիմադրելու ունակությունը կորցրած զինծառայողների նկատամամբ իրականացված դաժանությանը, նրանց մարմինների նկատմամբ անարգումներին:

«Սրանք արմենաֆոբիայի փաստեր են: Վայրագությունների փաստերը 3 ուղղություններով են ներկայացված զեկույցում՝ Թալիշի, Սեյսուլանի և Հարավային բլուրի՝ Լելեթեփե: Յուրաքանչյուր ուղղության հետ կապված փաստերը քննարկել ենք ըստ միջադեպերի»,- ասաց Ռուբեն Մելիքյանը:

Օմբուդսմանն անդրադարձել է ապրիլին Լեռնային Ղարաբաղի Թալիշ գյուղում Ադրբեջանի կատարած սանձարձակությանը և ագրեսիային:

«Էթիկական պատկերացումներից ելնելով՝ զեկույցը ներկայացվել է երկու տարբերակով՝ հրապարակային և սահմանափակ: Երկրորդ տարբերակն ավելի մանրամասն տեղեկություն է ամփոփում, այդ թվում՝ կատարված հանցագործությունների լուսանկարներ»,- ասել է Օմբուդսման Ռուբեն Մելիքյանը:

Ըստ նրա՝ «կարևոր է անմիջական կատարողների, նրանց հրամանատարների պատասխանատվության հարցը»:

Ռուբեն Մելիքյանը նշեց նաև, որ զեկույցում ներկայացված է ադրբեջանական աղբյուրների տեսանյութ:

«Զեկույցի մեջ ներառված տեսանյութերից մեկը ներկայացնում է զինվորականի և գյուղացու զրույցը (այն ամբողջությամբ կներկայացվի զեկույցի երկրորդ տարբերակում, իսկ հրապարակային տարբերակում դրա մի մասն է (հայ զինվորի կտրված գլուխը տեսանյութից հանված է): Զինվորականին է մոտենում գյուղացին և շնորհակալություն հայտնում՝ գլուխը կտրելու համար: Մենք չենք պնդում, որ հենց նա է հանցագործը: Բայց հաջորդ նյութում այդ նույն մարդուն Ադրբեջանի նախագահը պարգևատրում է: Մեր եզրակացությունն այն է, որ Ադրբեջանի ԶՈւ-ն ապրիլին հանցագործություն է կատարել, և դա բոլոր ուղղություններով համակարգված բնույթ է կրել նրանց հսկողության տակ հայտնված բոլոր զինվորական և քաղաքացիական հայերի նկատմամբ»,- ասել է Ռուբեն Մելիքյանը՝ ընդգծելով, որ միջազգային հանրության համար սա ահազանգ պետք է լինի և միջազգային կազմակերպությունները պետք գնահատական տան: Ադրբեջանը պետք է քննություն անցկացնի, քանի որ դա նրա միջազգային պարտավորությունն է:

Օմբուդսմանն ասել է, որ բոլոր հնարավորությունները կօգտագործվեն՝ զեկույցը տարածելու համար:

Սոնա Հարությունյան