ՀՀԿ նոր գլխացավանքը....

ՀՀԿ-ում սկսվել է ռեյտինգային ընտրակարգով ցուցակներ կազմելու գործընթացը, և քննարկվում է, թե որ տարածաշրջանում ում թեկնածությունն է առաջադրվելու։ Իսկ թե ինչպիսի՞ լարված պայքարում է ընթանում այս գործընթացը, արդեն իսկ հասցրել ենք ականատես լինել: Մի կողմից ՀՀԿ-ն ջանք ու եռանդ չի խնայում ազատվելու «բեռ» դարձած օդիոզ կերպարներից, որոնց ներկայությունը կուսակցությունում միայն արջի ծառայություն է դարձել, մյուս կողմից էլ՝ ծրագրային և գաղափարական պայքար առաջարկելու ՀՀԿ անկարողությունը պարզապես ստիպում է այս ուժին իր հիմնական հույսը կապել հենց նման կերպարների և նրանց «ավանդական» մեթոդների հետ: Այս օդիոզ կերպարներն էլ ոչնչով չեն զիջում միմյանց՝ գալիք ընտրությունների արդյունքում մանդատ ստանալու ցանկության մեջ: Դա է պատճառը, որ ՀՀԿ վերին բուրգում առկա հակասություններին և իշխանական բացի խնդրին ավելանում է նոր գլխացավանք՝ յուրայինների պայքարը միմյանց դեմ, ինչը սպառնում է դառնալ ՀՀԿ վերջի սկիզբը:

Այս ընտրությունները թերևս աչքի են ընկնելու ոչ միայն կուսակցությունների և դաշինքների միջև լարված պայքարով, այլ մենք ականատես ենք լինելու ոչ պակաս անզիջում ներկուսակցական, ասել է թե՝ ներիշխանական պայքարի, որն ի համեմատ մեծամասնական ընտրակարգի, անշուշտ էլ ավելի սուրն է լինելու:

Նույն ընտրատարածքում առաջադրված 5-10 թեկնածուներից յուրաքանչյուրը ջանք չի խնայելու իր մրցակիցներից, որոնք այս պարագայում նույն թիմակիցներն են, առավել շատ ձայն հավաքելու համար: Ջանք չի խնայելու առաջին հերթին ղեկավարությանը ապացուցելու իր պիտանի լինելը և ընդգծի սեփական արժեքը կուսակցության ներսում: Անշուշտ ոչ բոլոր թեկնածուների միջև են ջերմ և բարիդրացիական հարաբերություններ: Իսկ ինչպե՞ս կարող են լարվել այդ հարաբերությունները ընտրական գործընթացի ֆոնին, ոչ մեկի համար գաղտնիք չէ: Օրինակ՝ Շիրակի մարզի դեպքում, որտեղ ՀՀԿ-ի ռեյտինգային ցուցակով առաջադրվելու հավակնություններ ունեն Գյումրիի քաղաքապետ Սամվել Բալասանյանը կամ նրա որդին, Սերժ Սարգսյանի վերահսկողական ծառայության պետ Ֆելիքս Ցոլակյանը: Շիրակում առաջադրվելու ցանկություն ունեն նաև պատգամավորներ Մարտուն Գրիգորյանը, Արման Սահակյանը, Սուքիաս Ավետիսյանը, Աշոտ Աղաբաբյանը, Մուշեղ Պետոյանը և այլոք: Այս մարզում արդեն իսկ ուրվագծվում է թեժ և անզիջում պայքարը:

Այս նույն խնդրի շուրջ են նաև լարվել քաղաքապետ Տարոն Մարգարյանի և Միհրան Պողոսյանի հարաբերությունները: Տարոն Մարգարյանի և ԴԱՀԿ նախկին պետ Միհրան Պողոսյանի հարաբերությունները: Մ. Պողոսյանն ԱԺ ընտրություններում պատրաստվում է ՀՀԿ ռեյտինգային ցուցակով առաջադրվել Ավան, Քանաքեռ-Զեյթուն համայնքներն ընդգրկող թիվ 1 ընտրատարածքում և իր նախընտրական շտաբի համար սկսել է տարածքներ փնտրել նաև Ավան համայնքում: Սակայն այդ փաստը դուր չի եկել Տարոն Մարգարյանին, որը ևս աներորդու՝ ԱԺ պատգամավոր Ռոբերտ Սարգսյանի հետ ՀՀԿ ռեյտինգային ցուցակով առաջադրվելու է նույն ընտրատարածքում: Ու ստացվում է, որ չնայած ՀՀԿ-ից արված զգուշացումներին՝ Քեթրինի Միհրանն Ավանում խանգարում է նրանց:

ՀՀԿ-ականների մտավախությունն ավելի է խորացել ռեյտինգային ցուցակների մասով, քանզի հիմա ՀՀԿ-ի ներսում է թեժ պայքար ընթանալու, լուրջ փողեր են ծախսելու, և անգամ եթե ձայն բերեն կուսակցությանը, հնարավոր է, որ չընտրվեն: Արդյունքում իրենք կմնան «բորդյուրին», իսկ ՀՀԿ կաբինետային վերնախավը, որն առանձնապես էլեկտորատ չունի, շահած դուրս կգա իրենց հաշվին…

Ստելլա ԽԱՉԱՏՐՅԱՆ