Երևանյան «Հիկարի» կենտրոնը նշեց ճապոնական նոր տարին

Արևելքի երկրներում ընդունված տոնացույցին համապատասխան աքաղաղի տարին խորհրդանշող տոնական միջոցառումը տեղի ունեցավ հայ-ճապոնական «Հիկարի» կենտրոնում։ «Մենք վաղուց որոշել էինք, որ պիտի նշենք նոր տարին, սակայն որոշեցինք մի փոքր ավելի ուշ դա անել։ Քանի որ այսօր վերջին օրն է, երբ մոլորակում կա երկիր՝ Չինաստանը, որտեղ աքաղաղը պիտի իր իրավունքն երի տերը լինի, այսինքն՝ պիտի աքաղաղի տարին սկսի, այդ իսկ պատճառով մտածեցինք այս օրը նշել։ Կարծում եմ՝ աքաղաղը կամաց-կամաց թևիկները ձգում է և շարունակելու է իր հաղթարշավը»,-  ասաց հայ-ճապոնական «Հիկարի» կենտրոնի նախագահ Կարինե Փիլիպոսյանը։ Չինաստանում այս տարի հունվարի 28-ին է. այժմ աքաղաղը ամբողջությամբ մտել է իր լիազորությունների մեջ։

Միջոցառման ժամանակ երեխաները պատմեցին, թե ինչպես են ընդհանրապես նշում նոր տարին Ճապոնիայում, ինչ արարողակարգ է իրականացվում և ինչ համեղ ուտեստներ են պատրաստվում։

Ճապոնական ամանորյա սեղանին դրվում է ավանդական մի ուտելիք՝ մոծի, որը նրանք չեն ուտում։ Այն համարվում է աստվածների ուտելիք։ Հայ-ճապոնական «Հիկարի» կենտրոնի նախագահն ասաց, որ ճապոնացիներն ունեն մի հետաքրքիր սովորույթ, կապված նոր տարվա գիշերվա հետ։ «Մինչև սկսվելը, բոլոր տաճարներում զանգերը ղողանջում են 108 անգամ, որովհետև իրենք կարծում են, որ յուրաքանչյուր տարի, ամեն ոք իր վրա հավաքում է այդ քանակությամբ հանցանքներ, մեղքեր։ Նրանք համարում են, որ այդ 108 զանգերի հետ մաքրվում են այդ ամենից։ Վերջին զանգը խփում են վերջին վայրկյանին, երբ պետք է արդեն տարին փոխվի»,-պատմեց նա:

ՀՀ-ում Ճապոնիայի արտակարգ և լիազոր դեսպան Էյջի Տագուչին էլ իր հերթին նշեց, որ սովորաբար ընդունված է եղել, որ Նոր տարին նշում էին լուսնային օրացույցի համապատասխան, բայց արդեն մոտ 150 տարի է ֆիքսված օր է և տոնում են հունվարի մեկին։ «Այս տոնը Ճապոնիայում ավելի շատ արտասահմանից եկած հյուրերի համար են տոնում։ Մենք ընդամենը եր եք օր ենք տոնում Ամանորը, դրանից հետո արտասովոր ոչինչ չի արվում։ Հնարավոր է, որ երիտասարդությունը նշի, բայց ոչ պաշտոնական։ Այդ երեկո գնում ենք համապատասխան աղոթավայրեր և այնտեղ դիմավորում Նոր տարին ու աղոթում գալիք տարվա համար»։
Ամանորը Ճապոնիայում, ունի ազգային տոնի կարգավիճակ, ամեն տարի նշվում է հունվարի 1-ին Գրիգորյան օրացույցի համաձայն: 1873 թվականին Ճապոնիայում ընդունվում է Գրիգորյան օրացույցը, Մեյձի հեղափոխությունից 5 տարի անց, որից հետո Ամանորի պաշտոնական ամսաթիվը դարձավ հունվարի 1-ը ժամանակակից Ճապոնիայում։