Քարդաշյանի կողոպտման մեջ կասկածվողները վերաձուլել են նրա զարդերը՝ դրանք վաճառելուց առաջ

Ամերիկյան հեռուստաաստղ Քիմ Քարդաշյանին Փարիզ նրա ուղեւորության ժամանակ կողոպտման գործով հետաքննության մեջ գտնվող կասկածյալները խոստովանել են, որ վերաձուլել ու վաճառել են նրանից հափշտակված գրեթե բոլոր թանկարժեք իրերը: Անխաթար է մնացել միայն 4 մլն դոլար արժողությամբ նշանի մատանին: Այդ մասին գրել է Daily Mail հրատարակությունը:

Այն ցուցմունքների համաձայն, որոնք տվել է հանցագործության ենթադրյալ մասնակիցներից մեկը՝ 60-ամյա Օմար Այթ Քեդաշը՝ ծեր Օմար մականվամբ, իրենք մեկնել են Բելգիայի Անտվերպեն քաղաք՝ ավարը վաճառելու թանկարժեք իրերի ընդհատակյա շուկայում: Սակայն երկյուղում էին, որ ոսկերիչները կճանաչեն Քարդաշյանի զարդերը , ուստի որոշել են վերաձուլել դրանք: «Ընդամենն ստացվել է 800 գրամից փոքր-ին ավելի»,-հայտարարել է կասկածյալը: Ընդսմին կասկածյալները չեն փորձել իրացնել 20 կարատանոց ադամանդով նշանի մատանին. նրանք վախենում էին, որ աչքի ընկնող քարը կմատնի իրեն:

Ծեր Օմանը չի խոստովանել՝ ում մոտ է պահվում մատանին եւ քննիչներին չի հայտնել՝ որքան գումար է հաջողվել ստանալ Անտվերպենում թանկարժեք մետաղների եւ քարերի համար:

Հունվարի 9-ին հայտնի է դարձել, որ Ֆրանսիայում Քարդաշյանի կողոպտման գործով ձերբակալվել է 16 մարդ: Ավելի ուշ ձերբակալվածների մի մասին ազատել են, եւ հետաքննության մեջ մնացել են տասը կասկածյալներ:

2016 թվականի սեպտեմբերին ամերիկյան հեռուստաաստղը ժամանել էր Փարիզ՝ ներկա գտնվելու Նորաձեւության շաբաթին: Լույս հոկտեմբերի 3-ի գիշերը նրա հյուրանոցային համար են ներխուժել զինված կողոպտիչներ: Նրանք կապկպել են Քարդաշյանին եւ նրան տարել լոգարան, իսկ հետո հեռացել են հյուրանոցից՝ իրենց հետ տանելով ավելի քան 11 մլն դոլար գումարի թանկարժեք իրեր: