Դատախազն անգամ տեսանյութը չէր նայել. փաստաբանն ահազանգում է

Գևորգ Սաֆարյանի և նրա փաստաբան Տիգրան Հայրապետյանի՝ ընդդեմ նախաքննական մարմնի բողոքի լսման ժամանակ դատախազ Վահե Դոլմազյանը խոստովանել է, որ չի բացել քննիչի կողմից ուղարկված ծրարը, որում եղել է տեսաերիզ: Տեսաերիզում առկա է եղել տեսանյութ, որում պատկերված է եղել, թե ինչպես են ոստիկանները ծեծում քաղաքացիներին:

ԼՈւՐԵՐ.com-ի հարցին, թե վերոնշյալ հանգամանքն ինչպիսի ազդեցություն կունենա գործի ընթացքի վրա, փաստաբան Տիգրան Հայրապետյանն ասաց.

«Հաստատվել է դատախազական հսկողության ձևական լինելը: Եթե նախագահող դատավորն արդար գտնվի, դատական ակտը կբեկանի: Դրանից հետո այլ դատախազի և այլ քննչական մարմինների մասնակցությամբ՝ նախաքննություն պետք է իրականացվի: Եթե դատարանը վարվի ջայլամի քաղաքականությամբ, բացահայտ ձևով աչք փակի այս հանգամանքի վրա, կհեղինակազրկի ՀՀ-ին և արդարադատության համակարգը»:

Միայն տեսանյութը չդիտելու հանգամանքը չէ, որ Հայրապետյանին մտահոգվելու առիթ է տալիս: «Քրեական գործում կային փաստաթղթեր, որոնք բնօրինակները չէին, քննիչը մեկ այլ գործից պատճենահանել և դրել էր գործի մեջ: Դրանք կարդալ հնարավոր չէր: Նախագահող դատավորն ինքն էլ նախորդ նիստերի ժամանակ հայտնաբերել էր դա: Այսինքն՝ դատախազը դրանք չէր կարող կարդալ: Այս գործում անգամ Գեղամ Խաչատրյանի և Գևորգ Սաֆարյանի միջև առերսում չի եղել»,- նշում է փաստաբանը՝ շեշտելով, որ իր նշածները ճչացող հանգամանքներ են և պետք է նորից նախաքննություն ընթանա:

Փաստաբանի հետ զրույցում հետարքրվեցինք՝ Վերաքննիչ դատարան դիմելը զուտ ՄԻԵԴ հասնելու ընթացակարգ է, թե՞, այնուամենայնիվ, որոշակի հույսեր կան ՀՀ դատական ատյաններից, ինչին ի պատասխան՝ Հայրապետյանն ասաց. «Իհա՛րկե, մենք միշտ ակնկալում ենք, որ դատարաններից մեկը ինչ-որ ժամանակ արդար դատական ակտ կկայացնի»:

Արաքս Առաքելյան