Տոտալ թալան...

Նրանք, ովքեր հաճախ են ընթերցում մամուլ, դիտում լրատվական հաղորդումներ, մի խոսքով՝ փորձում տեղեկացված լինել երկրում տեղի ունեցող անցուդարձից, նկատած կլինեն, որ վերջին շրջանում բավականին ակտիվացել են հրապարակումները, տարատեսակ հաղորդումներն ու հաղորդագրություններն այն մասին, որ հայրենի «էլեկտրիկները» սկսել են հատկապես վերջին շրջանում՝ ձմռանից սկսած, փոքրիկ, իսկ երբեմն՝ նույնիսկ մեծ խորամանկությունների դիմել. հավելագրում են կատարում ու բնակչությանը, համենայնդեպս նրա մի մասին, ստիպում վճարել հոսանքի համար ավելին, քան իրականում ծախսել են: Մի խոսքով՝ ՀԷՑ-ը սկսում է վերադառնալ այն արատավոր պրակտիկային, որը բավական երկար տարիներ բնորոշ է եղել այս կարևորագույն կառույցին, ու մարդկանց բոլոր հույսերը, թե նախկին գործելաոճը կվերանայվի, ու ամեն բան կսկսեն նոր ու մաքուր էջից, բացարձակապես տեղին չէին. ոչինչ էլ իրականում չի փոխվել:

Թե հատկապես ինչով կարող է պայմանավորված լինել այս տհաճ ու միևնույն ժամանակ մարդկանց կենսական շահերը ոտնահարող, հացից կտրող երևույթի վերածնունդը, կարծես այնքան էլ դժվար չէ կռահել: Այդ անելու համար հարկավոր է ընդամենը մի փոքր ուշադիր լինել ու նկատել, որ հավելագրումների այս յուրօրինակ պիկը «տարօրինակ» զուգադիպությամբ կարծես համընկել է Հայաստանում նախընտրական շրջանի հետ. 2017-ի ապրիլին մնացել է ընդամենը մի քանի շաբաթ, ինչը, ըստ էության, նշանակում է, որ ժողովրդից փող քերելու համար՝ համապատասխանները քիչ ժամանակ ունեն, ու որքան ֆիզիկապես հնարավոր է, պետք է զարկ տրվի քերթման պրոցեսին. ամենևին էլ չի բացառվում, իսկ ավելի ճիշտ՝ դա չտեսնելն ուղղակի անհնարին է, որ ձմեռային հավելագրումների բուն պատճառը ոմանց՝ ընտրակաշառքի համար անհրաժեշտ փողեր կուտակելու անհագուրդ ցանկությունն է:

Ենթադրելի է, որ թաղային էլեկտրիկների ու նրանց ղեկավարության միջև գաղտնի պայմանավորվածություն է ձեռք բերվել՝ հուսալով՝ որքան հնարավոր է աննկատ մեթոդներով ամսական պլան կատարել: Մարդիկ էլ աշխատում են՝ ինչպես կարողանում են՝ տալով սեփական կրքերին լիակատար ազատություն:

Ինչ վերաբերում է ՀԷՑ-ի արձագանքին՝ կապված բնակչության շրջանում օրըստօրե մեծացող դժգոհությունների հետ, ապա, այստեղ ամեն բան սովորականի պես է. պատրաստակամ են յուրաքանչյուր դեպք լիակատարորեն հետաքննել, բացահայտումներ անել ու պատժել: Մի խոսքով՝ իսկևիսկ ընտրակաշառքի պես՝ բոլորը գիտեն, որ նման երևույթ կա, բայց որևէ մեկը ո՛չ կաշառք տվողի ձեռքն է բռնում, ո՛չ էլ՝ վերցնողի. համեմատությունը, համաձայնեք, ուղղակի անզուգական է...

Դավիթ ԲԱԲԱՆՈՎ