ՀՅԴ ոդիսականը. 2007-2017

2007 թվականին Հայ Հեղափոխական դաշնակցությունը խարհրդարանական ընտրությունների հայտ էր ներկայացրել «Մեր հին ընկերը Դաշնակցությունն է» կարգախոսով և խիստ սոցիալական ուղղվածություն ունեցող նախընտրական ծրագրով: 2007-ի համար նման ծրագիրը իրոք որ հեղափոխական էր, այդ պատճառով շատերի կողմից ի սկզբանե որակվեց անիրատեսական: Ժամանակը ցույց տվեց, որ շատերն այդքան էլ հեռու չէին ճշմարտությունից:

Դաշնակցականների պատկերացմամբ՝ եթե «Դաշնակցություն»-ը հնարավորություն ստանար կառավարություն ձեւավորելու, ապա 2008-ի հունվարի 1-ից նվազագույն աշխատավարձերը դառնալու էր 50 հազար դրամ, որը պետական բյուջեի համար մեծ բեռ չէր լինելու, դա չէր գերազանցի 11-12 միլիարդ դրամը: Հետևողական քաղաքականության արդյունքում առաջարկվում էր նվազագույն կենսաթոշակը սահմանել 30 հազար, միջինը՝ 50 հազար դրամ:

Միևնույն ժամանակ, նման հավակնոտ ծրագիր ներկայացնող քաղաքական ուժին որևէ կերպ չէր հաջողվում բացատրել՝ ինչպես է ստացվել, որ 4 տարի իրենց վստահված սոցիալական ոլորտում դեռ ֆուրորային զարգացում չի արձանագրել և ավելին՝ նման խնդիրների առջև է կանգնած: Թերևս դաշնակցականներին լծակներն էին պակասում, որոնք ի հայտ եկան ընտրություններից հետո, երբ այս քաղաքական ուժը դարձավ կոալիցիոն կառավարության մասնիկը: Սակայն քաղաքական դաշտում դիրքերի ամրապնդումը կարծես այդքան էլ չնպաստեց, որպեսզի ՀՅԴ-ն տեր կանգնի իր նախընտրական խոստումներին:

Արդեն 2012 թվականին կայացած խորհրդարանական ընտրություններին Հայ Յեղափոխական Դաշնակցությունը մասնակցեց որպես ընդդիմադիր բևեռը ներկայացնող քաղաքական ուժ: Վերջինիս հռչակած գլխավոր նպատակը ամբողջական իշխանափոխությունն էր: Բացի «ամբողջական իշխանափոխությունից», 2012 թվականին ՀՅԴ-ն ներկայացրել էր տնտեսական և սոցիալական բարեփոխումների մի ամբողջ փաթեթ։

Մասնավորապես, ըստ ծրագրի՝ Հայաստանում միջին կեսաթոշակը պետք է կազմեր 63.000 դրամ, պետական բյուջեն պետք է եռակի, իսկ ՀՆԱ-ն՝ կրկնակի աճեր։ «Դաշնակցության» ծրագրով նախատեսվում էր նաև 200 հազար նոր աշխատատեղերի բացում։ Իսկ այժմ տեսնենք՝ ինչպես է իրականացրել ՀՅԴ-ն իր խոստումները… ԱՎԾ տվյալների համաձայն՝ Հայաստանում միջին կենսաթոշակը կազմում է 40.441 դրամ, պետական բյուջեն 2012-2015 միջակայքում աճել է ընդամենը 1,3 անգամ, ՀՆԱ-ն նույն ժամանակահատվածում աճել է 1,8 անգամ, իսկ գործազրկության մակարդակը՝ 1,2 տոկոսով։

2012 թվականին «Դաշնակցության» նախընտրական ծրագրերի մեջ էր մտնում նաև որոշ ոլորտների միջին մասնագիտական և բարձրագույն կրթությունը անվճար դարձնելը: Լինելով փաստացի իշխանության մաս ու ղեկավարելով Կրթության և գիտության նախարարությունը՝ «Դաշնակցություն»-ը չի իրագործել անգամ սեփական նախընտրական խոստումը, որը պարտավորվել էր կատարել իշխանության գալու պարագայում։

2012-ին ՀՅԴ-ն արված նախընտրական խոստումների ճոխությամբ գերազանցեց ինքն իրեն: 2007-ին խոստացված 50 հազարանոց նվազագույն աշխատավարձը «դորդ ու բեշ» արած դաշնակցականները, 2012-ին խոստանում էին այն դարձնել 63 հազար դրամի, այսինքն՝ կրկնակի բարձրացնել: Թե որքանով հաջողվեց իրագործել այս կայսերական ծրագիրը՝ ակնհայտ է…

2017-ի խորհրդարանական ընտրություններին ՀՅԴ-ն մասնակցելու է՝ «Նոր սկիզբ, արդար Հայաստան» կարգախոսով: Ակնհայտ է, որ այս ընտրություններին ՀՅԴ-ն մասնակցելու է ոչ պակաս ամբիցիոզ ծրագրով, որտեղ թեև կլինեն հստակ առաջնայնությունները, ոլորտային առաջարկությունները տրամաբանական ընդհանուր հարթության մեջ կգծվեն ու սոցիալական պետության տեսլականի համատեքստում, սակայն առկա իրողությունների համեմատ այնպիսի ֆանտաստիկ արդյունքներ կնախանշվեն, որ դժվար թե արժանանան հասարակության վստահությանը:

Մի բան ընտրողի համար ակնհայտ է՝ դաշնակցականները և′ որպես ընդդիմություն չեն հասնել իրենց գաղափարների իրագործմանը, և′ որպես իշխանություն ստանձնել են պատասխանատվություն ու չեն կարողացել ապահովել խոստացված տնտեսական և սոցիալական բարեփոխումները։

Ստելլա ԽԱՉԱՏՐՅԱՆ