Եթե մեկ օր հայտնվեն Շիրխանյանի տեղում...

Այսօր ԱՆ ՔԿՎ հայտարարություն է տարածել այն մասին, որ Նորք Մարաշի զինված խմբի գործով կալանավորված ՀՀ նախկին փոխվարչապետ և պաշտպանության նախկին փոխնախարար Վահան Շիրխանյանը գտնվում է կալանավորված անձանց համար բավարար պայմաններով և իրականությանը չեն համապատասխանում նրա փաստաբանի հայտարարությունները. «Զանգվածային լրատվության միջոցներով մարտի 5-ին ՀՀ ԱՆ «Երևան-Կենտրոն» քրեակատարողական հիմնարկի կալանավորված անձ Վահան Շիրխանյանի փաստաբան Հայկ Ալումյանի այն հայտարարությունը՝ «խուցը նեղ է, փոքրիկ ու շատ խոնավ` պատերի ներքևի հատվածը խոնավությունից բորբոսնել է: Այդ նեղ խցում կալանավորները չորսն են եղել, սակայն այն բանից, երբ Վ. Շիրխանյանը դժգոհել է խցի պայմաններից ու վիճակից, մոտ մեկ ժամվա մեջ ևս մեկ կալանավոր են բերել խուց», իրականության հետ աղերս չունի: 

Հայտնում ենք, որ Վահան Շիրխանյանը գտնվում է կալանավորված անձանց համար նախատեսված բավարար պայմաններով 18 քմ խցում, ինչը սահմանված է Հայաստանի Հանրապետության «Ձերբակալված և կալանավորված անձանց պահելու մասին» օրենքով, և այդ խցում պահվում են չորս անձինք, այլ ոչ հինգ, ինչպես պնդում է փաստաբանը»:

ԼՈւՐԵՐ.com-ի թղթակցի հետ զրույցում Վահան Շիրխանյանի փաստաբան Հայկ Ալումյանն այս հայտարարությունն այսպես մեկնաբանեց.

«Միայն կցանկանամ, որ հայտարարություն տարածողները մեկ օր հայտնվեն այդ պայմաններում: Ինչ վերաբերում է, որ ես ասել եմ խցում 5 հոգի են, այո՛ հինգն են, նրանք պարզապես պարոն Շիրխանյանին չեն հաշվում»:

Փաստաբանը նշեց, որ այժմ դիտորդական խումբ է գնում ՔԿՀ, սակայն համոզված է՝ նրանց իրական պայմանները ցույց չեն տալու: 

Նշենք, որ Վահան Շիրխանյանն առողջական լուրջ խնդիրներ ունի, որի պատճառով չի կարողանում մասնակցել դատական նիստերին: 

Հիշեցնենք, որ Պաշտպանության նախարարի նախկին տեղակալ Վահան Շիրխանյանին մեղադրանք է ներկայացվել Քրեական օրենսգրքի 223-րդ հոդվածի 2-րդ մասով՝ «Հանցավոր համագործակցությանը մասնակցելը», որը պատժվում է ազատազրկմամբ՝ վեցից տասը տարի ժամկետով:

Սոնա Հարությունյան