Ինչ եղանակով են սգո ծառայությունները միլիոններ յուրացրել

«ՀՀ սոցիալական ապահովության պետական ծառայության կողմից իրականացվող ուսումնասիրությունների արդյունքում մենք հայտնաբերել ենք  դեպքեր, երբ նույն քաղաքացին ստացել է մի քանի հոգու համար նախատեսված թաղման նպաստ: Արձանագրվել է դեպք, երբ նույն անձը ներկայացրել է 300 մարդու մահվան վկայական է և ստացել նրանց հատկացվող թաղման նպաստները: Խոսքը վերաբերում է սգո ծառայություններ մատուցող ընկերություններին, որոնք, ներկայացնելով մահացած անձանց մահվան վկայականները, ստացել են թաղման համար նախատեսված 200 հազարական դրամները: ՀՀ սոցիալական ապահովության պետական ծառայությունն այս ուսումնասիրությունները կատարել է անձերի վերաբերյալ, հետևաբար՝ առկա չեն տվյալներ և վիճակագրություն, թե նման դեպքերից քանիսն են արձանագրվել մարզերում, քանիսը՝ Երևանում»,-այս մասին ԼՈւՐԵՐ.com-ի հետ զրույցում ասաց ՀՀ սոցիալական ապահովության պետական ծառայության մամլո քարտուղար Արամայիս Շահբեկյանը:

Արդյոք նման բացահայտումներից հետո չկա՞ անհրաժեշտություն նպաստների տրամադրման և, առհասարակ, սոցիալական ծառայությունների մատուցման ոլորտը կարգավորող օրենքները խստացնելու դիտարկմանն ի պատասխան՝ մեր զրուցակիցը նշեց, որ իրավական առումով՝ օրենքը հնարավորություն է տալիս թաղման նպաստ ստանալու իրավունքը պատվիրակել այլ անձի. «Ակնհայտ է, որ, եթե նույն անձը կարողանում է 300 մարդու թաղման նպաստ ստանալ, բնականաբար, այստեղ գործել է որոշակի օղակ: Բայց պետք է նշեմ, որ իրավաչափ է,  որ թաղման նպաստը կարող է ստանալ այն քաղաքացին, ով վկայական է ներկայացրել: Օրենքով նախատեսված է, որ այդ նպաստը ստանալու իրավունքը կարող են պատվիրակել այլ անձի: Մենք հայտնաբերել ենք նման դեպքեր և տվել համապատասխան ուսումնասիրություն, սա է մեր լիազորությունը, իսկ այն անձանցով, ովքեր կատարել են օրենքի խախտումներ, կզբաղվեն համապատասխան մարմինները: Իսկ օրենքներ խստացնելը կնշանակի ավելի բարդացնել նպաստի տրամադրման կարգը, ինչը մենք չենք ցանկանում, քանի որ մեր նպատակն է որքան հնարավոր է՝ թափանցիկ աշխատել»:

Արամայիս Շահբեկյանի փոխանցմամբ՝ իրենց ծառայությունն իրականացրել է ուսումնասիրություն, որի արդյունքները փոխանցվել է կառավարությանը, իսկ կառավարությունն  այն հանձնել է դատախազությանը: 

ԼՈւՐԵՐ.com-ի հետ զրույցում Քննչական Կոմիտեի մամլո խոսնակ Սոնա Տռուզյանը տեղեկացրեց, որ վերը նշված գործը ՀՀ Քննչական կոմիտեում վարույթ է ընդունվել և քննություն է իրականացվում: Նշանակվել են ստուգումներ՝ պարզելու համար, թե սգո ծառայություններ մատուցող որ ընկերությունները՝ ինչքան հարկ չեն վճարել: Ուսումնասիրությունները կատարվում են, դրանց արդյունքներով կիրականացվեն դատավարական որոշումներ, որոնց մասին լրացուցիչ կտեղեկացնենք:

Հիշեցնենք, որ ըստ դատախազության հաղորդագրության՝ նպաստներ ստացած անձինք տարբեր ժամանակահատվածներում հանդիսացել են միևնույն ՍՊԸ-ի աշխատակիցներ կամ առնչություն են ունեցել նշված ընկերության հետ և ընկերության տնօրենի կազմակերպմամբ ստացված գումարների դիմաց՝ ընկերությունը մատուցել է հուղարկավորման ծառայություններ:

Պարզվել է նաև, որ նշված ընկերությունը ներկայացրել է սխալ հաշվետվություններ: Նկատի ունենալով, որ արձանագրված խախտումներն առերևույթ պարունակում են հանցագործության հատկանիշներ՝ ՀՀ գլխավոր դատախազության պետական շահերի պաշտպանության վարչությունում ՀՀ քրեական օրենսգրքի 205-րդ հոդվածի 1-ին մասով նախատեսված հանցագործության հատկանիշներով հարուցվել է քրեական գործ, որի նախաքննության կատարումը հանձնարարվել է ՀՀ քննչական կոմիտեին:

Ստացվում է՝ սգո ծառայություններ մատուցող ընկերությունները յուրացրել են միլիոններ՝ չարամտորեն խուսափելուվ հարկեր վճարելուց: 

Աղավնի Սուքիասյան