Պատվերը փողով կամ շատ փողով

2013 թվականի այս օրերին էր, երբ "REINCARNATION" խումբը թողարկեց իր այցեքարտ համարվող երգերից մեկը՝ «Երևան»-ը: Երգը կարծես թե շատերի սրտից ու հոգուց էր բխում, ինչքա՜ն մարդ էր հեռացել Հայաստանից, ինչքա՜ն մարդ էր հիասթափվել, նեղսրտել ու... գաղթել՝ թողնելով հարազատ, սիրելի քաղաքը:

«Երկար ճանապարհ ես անցել, շատերն են եկել ու գնացել, քեզ փորձել են ծախել: Քո համար կռվել, միշտ պայքարել, քեզնով ապրել եմ: Գիտեմ՝ հիմա շատ զայրացած ես, հին գույներդ չկա՝ գողացված են, ինչ որ մեկն էլ քեզ տիրացել է ու բաժանել ընտանիքի մեջ, ուրիշ գույներով քեզ զարդարել են ու անցյալը քո մոռացել են...»,- ահա սա էին երգում խմբի տղաները ու վայելում հանրության սերն ու հարգանքը:

Բայց... բայց անցնում են տարիները, փոխվում են մարդիկ, փոխվում են պատկերացումները, երեկ թալանից ու ավիրումից խոսող խումբն այսօր քարոզում է թալանն ու ավիրողին, երգում է, թե փոխվել են ու եկել են աշխարհը փոխելու: Հետահայաց նայելով կառավարման այս թիմի անցած տարիներին՝ պատկերացումներն այքան էլ լավատեսական չեն, երգը փոխվել է, բայց գաղթն առկա է:

Երգերի բովանդակային արմատական փոփոխությունից՝ հարց է առաջանում. ի՞նչը փոխվեց. չկա՞ այլևս այն արտագաղթը, այն աղքատությունն ու աստիճանակարգումը, որը նախկինում առկա էր: Ոչինչ էլ չի փոխվել, կամ, եթե փոխվել է, ապա խնդիրներն են միայն ավելի խորացել: Երգն է փոխվել, ինչո՞ւ, որովհետև երգը պատվերով է, վճարողն էլ պատվիրել է...խոստացել են փոխվել, հավատացի՞ք: Այսպես, ամեն քարոզարշավին մշակութային սիրելի գործիչները պատռում են իրենց դիմակը, փոխվում են, քարոզում, հեղինակազրկվում... միայն փողի համար, առանց որևէ գաղափարի, առանց արժեքների, փող, փող ու շատ փող:

"REINCARNATION"-ի նոր երգը՝ աշխարհը փոխելու քարոզով, կարծես սառը ցնցուղ լինի: Ինչո՞ւ եմ սառը ցնցուղ որակում. բա որ իրո՞ք աշխարհը փոխեն, ստացվի այնպես, որ էլ գնալու տեղ չունենանք, բարդ է չէ՞:

Ի՞նչ են անելու մարդիկ, ովքեր հասցրել են հեռանալ այս երկրից ու կյանքը կառուցել հայրենիքից հեռու: Հույսս մեծ է, որ ոչ մի խոստում չկատարած ուժի այս մի խոստումն էլ չի կատարվի և աշխարհը փոխելու ծրագիրը չի իրագործվի:

Վերջաբանի խոսքը՝ վարչապետի ոճով.

-Կուզեի՞նք ՀՀԿ-ն աշխարհը փոխեր:

-Իհա՛րկե չէինք ուզի:

-Կուզեի՞նք ՀՀԿ-ն ինքը փոխվեր:

-Իհա՛րկե, կուզեինք: