Իսրայել Սարգսյանը (Իսո) դադարեցրել է հացադուլը

«Կայարանցի Թևոսիկի» եղբոր՝ Արթուր Սաֆարյանի սպանությունը պատվիրելու, այնուհետև սպանության ենթադրյալ կատարողին սպանելու մեջ մեղադրվող Իսրայել Սարգսյանը (Իսոն) դադարեցրել է հացադուլը: Այս մասին ԼՈւՐԵՐ.com-ի թղթակցին հայտնեցին ՀՀ արդարադատության նախարարության Քրեակատարողական վարչության հանրային կապերի պատասխանատու Գոռ Ղլեչյանը:

Նշենք, որ Արթուր Սաֆարյանը փետրվարի 10-ից գտնվում էր հացադուլի մեջ: Նա հացադուլ էր հայտարարել՝ իր գործով դատական նիստերը պարբերաբար հետաձգվելու պատճառով:

Իսրայել Սարգսյանի առողջական վիճակը բավարար է գնահատվում: 

Մեր այն հարցին, թե արդյոք բավարարվել են Իսրայել Սարգսյանի պահանջները, Գոռ Ղլեչյանը պատասխանեց, որ դիմումի մեջ պատճառ նշված չէ:

Իսրայել Սարգսյանին մեղադրանք է առաջադրվել այն բանի համար, որ նա «կազմակերպել և օժանդակել է Մովսես Ներսիսյանի կողմից Արթուր Սաֆարյանի սպանության կատարմանը, ապա այդ հանցանքը թաքցնելու նպատակով' ապօրինաբար, դիտավորությամբ՝ զրկել է կյանքից Մովսես Ներսիսյանին, բացի այդ՝ ապօրինի ձեռք է բերել և կրել է հրազեն հանդիսացող «ՏԿ» մոդելի ատրճանակ ու ռազմամթերք հանդիսացող՝ 3 հատ 5.6 մմ տրամաչափի փամփուշտներ, նաև ապօրինի ձեռք է բերել ու իր փաստացի բնակության վայր՝ ք. Երևան Կոմիտասի պող. 27/1 շենքի բն. 7 հասցեին հարող տարածքում գտնվող ավտոտնակում առկա երկաթյա պահարանում պահել ռազմամթերք հանդիսացող՝ նպատակային օգտագործման համար պիտանի, գործարանային արտադրության «ԷԴՊ» տեսակի էլեկտրական թով 4 հատ ճայթիչներ և նետողական պայթուցիկ նյութերի շարքին դասվող՝ գործարանային արտադրության դեղնաշագանակագույն և շագանակագույն գլանաձև արկային վառոդի՝ թվով 5 հատ հատիկներ»: