Հայ բիզնես լեդիների խնդիրներն ու ՎԶԵԲ-ի 55 մլն դոլարը

«Հայաստանում կանանց ձեռներեցության մեջ ներգրավելու գործընթացում կան մի շարք խնդիրներ, և ՀՀ կին ձեռներեցների ցանցը պատրաստ է սատար կանգնելու՝ նրանց բիզնես ծրագրերն իրականացնելու համար: Կանայք մեր աջակցությանը դիմում են առավելապես ֆինանսական խնդիրներով, նրանք ներդրումների կարիք ունեն, ուստի այստեղ կանանց պետք է օգնեն բանկերը՝ վարկավորումների միջոցով: Կանանց ՓՄՁ-ների զարգացման համար հաջորդ խոչընդոտը ցանցերն են և մրցակցությունը, որը շատ հաճախ բաց և ազնիվ չէ»,-այս մասին այսօր «Գործարար կանայք» միջոցառման ժամանակ ասաց ՀՀ կին ձեռներեցների ցանցի համակարգող Լիլիթ Ասատրյանը: Վերջինիս խոսքով՝ Հայաստանում բիզնես լեդիների աշխատանքի խոչընդոտներից է նաև փոքր շուկան, որն առավել ցայտուն կերպով է վնասում բիզնես գործունեությանը՝ հատկապես ՓՄՁ-ների պարագայում: 

Որպես գործարար կին՝ միջոցառման ժամանակ ներկաների հետ իր փորձով կիսվեց նաև «Ինգրեդիենտ» սրճարանի հիմնադիր Վարդանուշ Պետրոսյանը: Վերջինս, խոսելով իր ծավալած բիզնես գործունեության մասին, նշեց, որ նախնական շրջանում իրենց համար մեծ խնդիր էր մասնագետներ գտնելը, ովքեր կարող էին իրենց փորձով օգնել ավելի ճիշտ կողմնորոշվել. «Երբ նոր էի սկսում իմ փոքրիկ բիզնեսը, առաջին խոչընդոտը,  որին հանդիպեցի, այն էր, որ չկային մասնագետներ, որոնցից կարող էի խորհուրդ հարցնել՝ ինչպե՞ս անել և ինչպե՞ս սկսել: Հաջորդ խնդիրն, ըստ իս, նաև հայաստանյան շուկայի փոքրությունն էր»,-իրեն հանդիպած խնդիրները մատնանշեց կին գործարարը՝ հավելելով, որ նմանատիպ միջոցառումները լրացնում են այդ բացը: 

Նշենք, որ ՎԶԵԲ-ի կողմից տրամադրվող 55 մլն ԱՄՆ դոլարն ու տրվող հնարավորություններն ուղղված են փոքր և միջին ձեռնարկություններին և պարտադիր պայմաններից է՝ աշխատանք միայն տեղական ընկերությունների հետ, որտեղ որոշում կայացնողը կին է լինելու:

Ծրագրի շրջանակներում աշխատելու են մասնագիտացված խորհրդատուներ, ովքեր պատրաստ են տալ անվճար խորհրդատվություն՝ բիզնես ոլորտում կանանց առաջատար դարձնելու համար:  

Աղավնի Սուքիասյան