Միգուցե թուրքերը փող են տալիս, որ մեր բաքերը լցվեն անորակ վառելիքով. Գուրգեն Եղիազարյան

Ապրիլյան քառօրյա պատերազմի վերաբերյալ վարչապետ Կարեն Կարապետյանի հայտարարություններն այն մասին, թե այդ օրերին ռազմական տեխնիկան շատ դեպքերում չի աշխատել անորակ վառելիքի պատճառով, նոր բացահայտումների առիթ է դարձել: Պարզվում է՝ տարիներ շարունակ Հայաստան և Արցախ անորակ վառելիք է ներկրվել, ինչն էլ հանգեցրել է ոչ միայն ռազմական տեխնիկայի, այլև գյուղտեխնիկայի, տրանսպորտային միջոցների խափանումների:

Խնդրի մասին բարձրաձայնել է նաև Արցախի վարչապետ Արա Հարությունյանը՝ նշելով, որ շուկայում առկա է անորակ դիզվառելիք: Նա անդրադառնալով ապրիլյան դեպքերին, փաստել է, որ այդ ժամանակ և հաջորդող ամիսներին պաշտպանության բանակի համար աշխատող շինարարական մասնավոր ընկերությունները բազմաթիվ խնդիրներ են ունեցել վառելիքի հետ, քանի որ այն արագ կարգով ձեռք է բերել կառավարությունը՝ մասնավոր մատակարարներից:

Թեմայի շուրջ ԼՈւՐԵՐ.com-ի թղթակիցը զրուցեց ԱԱԾ պետի նախկին տեղակալ Գուրգեն Եղիազարյանի հետ: Վերջինս մեզ հետ զրույցում նշեց. «Երբ մեր ուղղաթիռը թշնամին խոցեց, պարզ չէ՞ր՝ ինչպես դա եղավ: Խնդիրն առանց զենքի թշնամուն ընդառաջ գնալն էր: Բայց հարց է առաջանում՝ ինչո՞ւ, ինչի՞ համար: Այն էլ երկու ուղղաթիռ, որ մեկին չհասցնեն խոցել, երկրորդը պարտադիր խոցվի: Ոչ ոք պատասխան չտվեց դրա համար: Այդ զորավարժություններ անցկացնող նախարարին բերեցին Երևանում պաշտոն տվեցին, որ հետո էլ սկսեն բացահայտումներ անել, թե քանի տասնյակ հազարավոր դոլարներ է գողացվել բանակից»: 

Գուրգեն Եղիազարյանն այն կարծիքին է, որ թեև վարչապետի կողմից հնչել է շատ հասցեական հայտարարություն, բայց միևնույն է, այդ հայտարարության հետքերով չեն գնա. «Հիմա ձեր կարծիքով բան են անելո՞ւ: Ոչ մի բան չեն անելու խնդիրը բացահայտելու և լուծելու համար: Իսկ թշնամու դիմաց երեխաների կյանքն է, որոնք ոսոխի դեմ բահերով են կանգնում: Պատերազմի ժամանակ հայտարարում էին, թե ռմբակոծում էր և Ա կետից Բ կետը զինամթերք հասցնել չէին կարողանում, դրա համար մեր պատանիները ոսոխի դիմաց կանգնած էին բահերով: Գետի՛նը մտնեք, բա ձեր հաշվարկները խաղաղ պայմանների համար ե՞ն միայն, դուք չեք հաշվարկո՞ւմ, որ պատերազմի ժամանակ ռմբակոծելու է թշնամին և դուք պարտավոր եք և՛ թիկունքը, և՛ ճակատը ապահովել: Մեկը դրա համար պատասխան տվե՞ց»: 

Հարցին՝ ինչ քայլերի պետք է դիմի ԶՈՒ-ն, որ կարողանա բացահայտել նման դեպքերը, որպեսզի ռազմական տեխնիկան անորակ վառելիքից չտուժի, Գուրգեն Եղիազարյանը պատասխանեց.

«Անորակ դիզվառելիքի դեպքում պարզ է, որ շարժիչը շարքից դուրս պետք է գա: Իսկ ի՞նչ իմանանք, որ անորակ վառելիքը բանակին տվողը թուրքական գործակալ չէ, որտեղի՞ց իմանանք այս հարցի պատասխանը: Միգուցե թուրքերը փող են տալիս, որ մեր բաքերը լցվեն անորակ վառելիքով, որ պատերազմի ժամանակ դրանք չկարողանան շարժվել: Պետք է հենց այստեղից սկսել և գնալ լիտր- լիտրի հետևից»,- խոսքը եզրափակեց նա:

Սոնա Հարությունյան