ՀՀԿ-ն կերպարանափոխվում է...

Հետևություններ անելով այն քաղաքական իրավիճակից, որ կար 2016 թվականին, «Հանրապետական» կուսակցությունն այսօր փորձում է որոշ չափով ազատվել այն ամենից, ինչը բացասական էր ազդում իր իմիջի վրա: Իշխող ՀՀԿ-ն ամեն ինչ անում է, որ ընտրություններից առաջ չասոցացվի ՀՀԿ-ի հետ: Սա զարմանալի չէ, այլ բնական ու տրամաբանական, քանի որ, առաջին՝ մարդիկ չեն ուզում լսել ՀՀԿ, ՀՀԿ-ական, Հանրապետական անունը:

Սպասվում էր, որ ՀՀԿ-ն չինովնիկական և կարծրացած մոտեցումներ առաջ կբերի, բայց քարոզարշավի առաջին օրվա դրությամբ թարմությունը նկատելի էր: Եվ սա ոչ թե ՀՀԿ-ի, այլ Կարեն Կարապետյանի մոտեցումն է. ՀՀԿ-ն բավականին լուրջ ուղերձ թողեց առաջին տասնյակով, որ գնում է երիտասարդացման և սերնդափոխության, ինչը հաստատեց նաև իր նախընտրական հոլովակով: ՀՀԿ-ն փաստացի հասկացնում է, որ գնում է ռեբրենդինգի: Հոլովակում չկա որևէ ՀՀԿ-ական, բացի Կարեն Կարապետյանից և ի դեմս Կարեն Կարապետյանի` ՀՀԿ-ն գնում է ռեբրենդինգի:

Կարեն Կարապետյանի իմիջը լիովին բավարար էր կառավարության նոր կազմի պարագայում և միգուցե նաև ՀՀԿ-ում վստահության տարրեր մտցնելու առումով: Իշխանության տեսանկյունից Կարեն Կարապետյանի ընտրությունը ճիշտ է, որովհետև Կարեն Կարապետյանի մասին հիշողությունները, հասարակության որոշակի շերտի դրական վերաբերմունքը և համակրանքը նրա նկատմամբ կարող են ՀՀԿ-ի համար առավելություններ ապահովել:

ՀՀԿ ղեկավարությունը ցանկանում է կուսակցության վերնախավում հեղափոխական սերնդափոխություն իրականացնել, և 2017թ. խորհրդարանական ընտրություններին ներկայանալ նոր և ավելի երիտասարդ դեմքով: Դեռևս 2012թ. խորհրդարանական ընտրությունների ժամանակ իշխանությունը ցանկություն ուներ խորհրդարան չբերել գործարարների, որոնք իրենց միակ պարտքն են համարում խմբակցության ղեկավարի ազդանշանով սեղմել կողմ կամ դեմ կոճակները, բայց բացարձակ անտարբեր են խորհրդարանում քննարկվող հարցերի նկատմամաբ, և չեն կարող որևէ կապակցված միտք արտահայտել դրանց վերաբերյալ:

Հիմա իրավիճակը բոլորովին այլ է. նոր Սահմանադրությամբ այլևս նախագահական ընտրություններ չեն լինելու, և հետևաբար խնդիր չկա մտածելու, թե ինչպիսին կլինի գործարարների դիրքորոշումն ընտրություններից հետո: Իշխանությունը հիմա էլ ունի այդ մարդկանց աջակցության կարիքը տեղերում, և նրանց ասված է, որ իրենց «քցելու» խնդիր դրված չէ:

Ուղղակի խորհրդարանում պետք է լինեն մարդիկ, որոնք կարող են զբաղվել օրենսդրական աշխատանքով, որոնք ունեն կրթություն և քննարկվող հարցերի վերաբերյալ կարող են սեփական կարծիք արտահայտել ու պաշտպանել իշխանության դիրքորոշումը: Գործարար պատգամավորներին ասվել է, որ եթե իրենք իրենց շրջապատում ունեն այդպիսի մարդիկ, որոնց կարող են գործուղել խորհրդարան, ապա իշխանությունը պատրաստ է քննարկել նաև նրանց թեկնածությունը:

Այլ հարց է, թե որքանով ՀՀԿ այս ռեբրենդինգը ազդեց ՀՀԿ վարկանիշի և հանրության մոտ իշխող քաղաքական ուժի ընկալման վրա: Մի շարք սոցիոլոգիական հարցումները գալիս են ապացուցելու, որ այս «կոսմետիկ» փոփոխությունները էապես չեն ավելացրել ՀՀԿ ռեյտինգը, այն այժմ երկրորդ տեղում է՝ զիջելով «Ծառուկյան» դաշինքին: Հասարակական ռեակցիան, որը ակնկալում էր տեսնել ՀՀԿ-ն իրեն չարդարացրեց:

Փոխվել է իրավիճակը, և հանրությունը այժմ պահանջում է ոչ միայն, և ոչ թե դեմքերի, այլ խորքային և համակարգային փոփոխություններ, սեղանին դրված գործողությունների, քայլերի հստակ ծրագիր: Մինչդեռ օրվա իշխանությունները ամեն կերպ խուսափում են խոստումներ տալ կամ մտնել ծրագրային պայքարի տիրույթ: Հետևաբար, սա է թիվ մեկ պատճառը, որ ՀՀԿ նախընտրական ռիբրենդինգը չի տվել այդքան սպասված արդյունքները…

Ստելլա ԽԱՉԱՏՐՅԱՆ