Կին քաղաքական գործչին չընդունելու կարծրատիպը կոտրված է

Կանայք ընտրական գործընթացների ժամանակ Հայաստանում տղամարդկանց հետ պայքարում են՝ ինչպես հավասարը հավասարի: Մարտի 14-ին կայացած ասուլիսում այս տեսակետը հայտնեցին «Ազատ դեմոկրատներ» կուսակցության թեկնածու Անահիտ Բախշյանը , «Հայկական վերածնունդ»-ի թեկնածու Մարիաննա Ֆրունջյանը և հոգեբան Լաուրա Պետրոսյանը:

«Քաղաքական գործընթացում ես շատ տարբերություն չեմ զգում՝ կին է, թե տղամարդ: Մենք հավասար իրավունքներ ունենք: Կարծում եմ, որ մեր սոցիումում, երբ հայտնվում է կին, որն ունի կառավարելու հմտություններ, շատ հանգիստ ընդունվում է հասարակության կողմից: Անկախ նրանից՝ կին է, թե տղամարդ, պետք է նայել գործի արդյունավետությանը: Նույնիսկ, երբ հռչակվեց Առաջին հանրապետությունը, մեր կառավարության մեջ կին կար: Մեր կարծրատիպերը շատ խոր չեն»,-ասաց Անահիտ Բախշյանն ու ավելացրեց, որ ինքն ազատ աշխատում է, և իրեն ոչ ոք չի խոչընդոտում: Իսկ տղամարդկանց մրց ակից չի համարում, քանի որ աշխատում են տարբեր ընտրազանգվածների հետ:

«Ողջունելի է, որ այս ընտրական գործընթացում կինը յուրահատուկ տեղ ունի: Ես նույնպես ունեմ իմ թիրախային լսարանը: Բազմազավակ մայր լինելն ինձ միայն ուժ է տալիս: Մենք հասարակական հատվածում ստեղծել ենք բազմաթիվ սոցիալական կոալիցիաներ: Հիմա ինչու՞ չփորձեմ ուժերս նաև այստեղ՝ քաղաքականության բնագավառում: Այժմ սեղանիս է հաշմանդամություն ունեցող անձանց հետ կապված օրենքի նախագիծը, որը պետք է կյանքի կոչել»,- ասաց Մարիաննա Ֆրունջյանը:

Հոգեբան Լաուրա Պետրոսյանի կարծիքով՝ այսօր շատ քիչ մասնագիտություններ կան, որոնցում զգացվում է կին-տղամարդ տարբերությունը: Ժամանակի ընթացքում կանայք սկսել են շատ ավելի մտնել կառավարման գործընթացի մեջ:

«Եթե քաղաքականության մեջ կինը մասնագիտական դեֆորմացիայի չի ենթարկվում՝ չի կորցնում իր կանացիությունը, նրան ընկալում են դրական: Կին քաղաքական գործչին չընդունելու կարծրատիպը կոտրված է: Մենք պատրաստ ենք որոշակի պաշտոններում տեսնելու կանանց: Հավասարությունը նկատվում է շատ բնագավառներում»,- ասաց հոգեբանն ու հավելեց, որ կանայք պետք է կարողանան իրենց ինտուիցիան օգտագործել ճիշտ ժամանակին: