Ո՞րն է իշխանության գինը...

Մարտի 25-ին Հայաստանում հայտարարվել է Հայաստանի ներդրողների ակումբի հիմնադրաման ստեղծման մասին, որը ներառելու է Ռուսաստանի 3 տասնյակ հայ գործարարների, ամենահարուստ հայի՝ Սամվել Կարապետյանի գլխավորությամբ: Դեռևս հունվարին վարչապետի Մոսկվա կատարած այցի ընթացքում ձեռք էր բերվել նման ակումբ ստեղծելու համաձայնություն: Կարեն Կարապետյանը ընդգծված կերպով ջանում է այս ակումբը ներկայացնել իբրև ագրեսիվ բիզնեսի առանցք, որը պետք է զարկ հաղորդի օր-օրի անդունդը գահավիժող հայկական տնտեսությանը:

Այսպիսով, վարչապետ ընդգծում է՝ կառույցը բարեգործության նպատակով չէ, որ ստեղծվում է: Բարեգործության՝ միգուցե, սակայն այն, որ նախընտրական շրջանում նման նախաձեռնությամբ հանդես գալը և հապճեպ կյանքի կոչելը ունի նաև լատենտ նշանակություն: Այս քայլը միտված է առաջին հերթին գործող իշխանությունների դիրքերի ամրապնդմանը, հետևաբար նաև՝ ընտրությունների արդյունքում այդքան բաղձալի մեծամասնության ապահովմանը:

Մի կողմ դնելով այս նախաձեռնության տնտեսական ասպեկտները, հարկ է նշել, որ մեր երկրում ձևավորված ավանդույթի համաձայն՝ իշխանությունը պատկանում է խոշոր կապիտալին: Այս պահին երկրում գերակշռում է արևմտյան կապիտալը, դա բացահայտվեց նաև մի շարք օֆշորային սկանդալների ֆոնին:

Այս իրավիճակը, այն էլ ընտրություններին ընդառաջ չէր կարող չմտահոգել ընտրությունների արդյունքներում ոչ պակաս շահագրգռված ռուսական կողմին: Հետևաբար արդեն իսկ ՌԴ դաբրոն ստացած վարչապետի նախաձեռնությամբ երկիր է բերվում ռուսական կապիտալը, որի գլխավոր նպատակն է հակակշիռ ստեղծել արևմտյանին:

Չմոռանանք, որ կապիտալը ազդեցության հզորագույն գործիքներից մեկն է հանդիսանում, ըստ այդմ՝ պետք է ենթադրել, որ ընտրություններից հետո Մոսկվան լրջագույն կերպով նախապատրաստվում է ընդլայնել իր ազդեցությունը ոչ միայն ՀՀ-ում, այլ նաև տարածաշրջանում: Հանրությունը այս բարդ գործընթացներում կրկին ստանձնելու է դիտորդի դերը: Քանզի որոշողը կապիտալն ու դրա կրողներն են լինելու, որոնք էլ անթաքույց նպատակ են հետապնդում՝ փոխել կապիտալի հաշվեկշիռը Հայաստանի տնտեսությունում:

Տարիներ շարունակ իշխանությունները հենց այս խնդիրն են ջանացել լուծել, սակայն նայելով մեր այսօրվա տնտեսության վիճակին, հասկանալի է դառնում, որ ցանկությունները մնացել են անկատար: Կստացվի՞ արդյոք այս անգամ, դժվար է ասել: Երկրին անհրաժեշտ է ոչ թե երկու տասնյակ, այլ Սփյուռքի համընդհանուր օգնությունը: Այդ համատեքստում հարց է առաջանում, թե ինչ է լինելու ապրիլի 2-ից հետո, երբ հաջորդ ընտրությունը գործնականում հինգ տարի անց է: Նեդրումները կդառնա՞ն իրականություն, թե՞ ոչ:

Վարչապետ Կարեն Կարապետյանը հայտարարել է ընթացիկ տարում մոտ 850 միլիոն դոլարի ներդրումների սպասման մասին: Իսկ ընդհանուր առմամբ նա խոսել է արդեն իսկ հաստատված 3,2 միլիարդ դոլարի ներդրումային ծրագրերի մասին: Կարեն Կարապետյանը հռչակել է Հայաստանում իշխանության գինը: Քանի որ կապիտալի հարաբերակցությունը, շոշափելի դեր ունի իշխանության հարաբերակցությունը փոխելու համար:

Ստելլա ԽԱՉԱՏՐՅԱՆ