«Փաստ». «Հոկտեմբերի 27–ի գործը, ինչ կա–չկա' բացահայտված է, և ամեն ինչ քրեական գործի նյութերում է». Գագիկ Ջհանգիրյան

«Փաստ» օրաթերթը գրում է.

««Փաստի» հարցերին պատասխանում է «ՀԱԿ» համամասնական թեկնածու, ՀՀ նախկին զինդատախազ Գագիկ Ջհանգիրյանը

– Պարոն Ջհանգիրյան, Լևոն Տեր–Պետրոսյանն իր վերջին հարցազրույցում ասաց, որ ինքը ԼՂ լուծման հարցում Սերժ Սարգսյանի կողքին է, բայց Սերժ Սարգսյանն այսօր այդ լուծման մասին չի խոսում ու հնարավոր է ընտրություններից հետո կրկին մանևրի: Չե՞ք կարծում, որ արդյունքում սա կդիտվի ռևերանս իշխանությանը:
– Ոչ, Լևոն Տեր–Պետրոսյանը մեկ անգամ ևս բարձրաձայնեց այն բոլոր քննադատական մոտեցումները, որ ՀԱԿ–ը 2007–ից սկսած իշխանությունների հասցեին արտահայտել է՝ կոռուպցիա, երկրի ունեցվածքի թալան, անարդարություններ, ընտրակեղծիքներ և այլն, բայց լինելով պետական մարդ, հազվագյուտ քաղաքական տրամաբանության ու մտածողության կրող, հասկանում է, որ Հայաստանի առաջ կանգնած գլխավոր մարտահրավերը այսօր Արցախի խնդրի կարգավորման հարցն է: Այդ պատճառով էլ միմիայն այդ հարցում Լևոն Տեր–Պետրոսյանը բարձրաձայնեց, որ սատարելու է խաղաղ կարգավորման գործընթացին՝ անկախ, թե ով է իշխանություն: Այսինքն՝ էստեղ Սերժ Սարգսյանին կամ ՀՀԿ–ին սատարելու խնդիր չէ, որ դրված է:

– Չե՞ք կարծում, որ շտապեց Տեր–Պետրոսյանը:
– Չէ, չեմ կարծում: Ես կարծում եմ՝ ՀՀ–ն ուշացել է 20 տարի առնվազն, որովհետև եթե մենք նայենք Հայաստանի և Ադրբեջանի ուժերի հարաբերակցությանը 1997–98 թթ.–ին ու այսօր, կտեսնենք, որ մենք այդ հարաբերակցության մեջ կորցրել ենք:

– Չի բացառվում, որ ընտրություններից հետո իշխանությունը կրկին փորձի մանևրել, ինչպես 20 տարի է արել, իսկ արդյունքում ՀԱԿ–ը կկորցնի արմատական ընդդիմության նախկին կերպարը:
– Չեմ կարծում: Լևոն Տեր–Պետրոսյանը տարածաշրջանում ընթացող քաղաքական պրոցեսների համատեքստում համոզված է, որ այս կարգավորումը ոչ թե հնարավոր է հետաձգել, այլ կարգավորման պրոցեսն արագացնում են այս տարածաշրջանում աշխարհաքաղաքական խաղացողները՝ կապված Մերձավոր Արևելքի իրավիճակի հետ: Իսկ Տեր–Պետրոսյանը միշտ քաղաքական կատեգորիաներով է մտածում և ժողովրդի հետ միշտ ազնիվ ու բաց է խոսում: Նույնիսկ մեր ներսում բազմաթիվ կարծիքներ կային, որ խաղաղության թեզը կարող է մեզ ընտրություններում վնասել, բայց տեսնում եք, որ էդ թեզն աշխատում է: Որովհետև ինչքան էլ ժողովրդի «միտքը լվացած» լինեն, ժողովուրդը բանական էակ է և չի կարող պատերազմի կողմնակից լինել այն պարագայում, երբ ինքը 20 տարի առաջ ռազմական խնդիրը լուծել է:

– Պարոն Ջհանգիրյան, այդ դեպքում չե՞ք կարծում, որ 2008–ին էլ պետք չէր այդքան ռադիկալ լինել, այդպես կոշտ քննադատել, սրել իրավիճակը, իշխանությունը միգուցե չէր գնա «Մարտի 1–ի» զոհերի ճանապարհով:
– Ուզում եք ասել՝ ընդդիմությունը, որ պայքարում էր ընտրակեղծիքների դեմ, չպիտի՞ բողոքեր, որովհետև գիտեր, որ իշխանությունը խաղաղ ցուցարարների՞ է սպանելու:

– Բայց հիմա ի՞նչ է փոխվել:
– Հիմա արցախյան խնդրի կարգավորումը շատ արագ ռելսերի վրա է դրված: Հիմա աշխարհաքաղաքական խաղացողները փորձում են արագ լուծել ղարաբաղյան խնդիրը: Դրա համար, մնացած հարցերը չմոռանալով, առաջ է մղվել խաղաղ կարգավորման գործընթացի աջակցության խնդիրը: Ինչ է՝ մենք հրաժարվե՞լ ենք «Մարտի 1–ի» սպանությունները բացահայտելու, մարդասպաններին պատժելու պահանջից:

– Անդրադառնանք Ձեր գործունեությանը: Դուք ՀՀ զինդատախազ եք եղել, և զինվորական գործեր կան, որոնցով մինչ այսօր բողոքներ կան, մարդիկ բանտերից բողոքում են: Զզջո՞ւմ եք Ձեր սխալների համար:
– Բացարձակ, բացարձակ: Չկա էդպիսի գործ, ոնց որ Դուք եք ասում, որ բանտերից բողոքում են, որով մեղադրանքը ես եմ հաստատել, կան իմ օրոք են նրանք դատապարտվել:

– Օրինակներից է Մատաղիսի հայտնի գործը, որը կապված է Ձեր գործունեության հետ:
– Մատաղիսի դեպքով որևէ խնդիր չկա: Ես էսօր էլ պահանջատեր եմ: Անցել է 3 տարի, երբ գործն ուղարկվել է լրացուցիչ քննության, սպանությունը ֆորմալ չբացահայտված է, բա ո՞ւր են էդ իրական մարդասպանները: Բա ինչի նախաքննական մարմինը, դատախազությունը իրական մարդասպաններին չի պատժում: Թող բերեն իրական մարդասպաններին պատժեն, ինձ էլ հետը: Ես մեծ սիրով էդ պատիժը կկրեմ, եթե մարդասպաններն ուրիշ մարդիկ են:

– Պարոն Ջհանգիրյան, ասել է թե' պնդում եք, որ լինելով զինդատախազ, իշխանության պատվեր չե՞ք կատարել և ոչ մի բանի համար չե՞ք զղջում, չնայած հենց Ձեր վարած «Հոկտեմբերի 27–ի» գործը չբացահայտվեց:
– Բայց Ձեզ ով ասաց՝ չբացահայտվեց: «Հոկտեմբերի 27–ի» գործը, ինչ կա–չկա' բացահայտված է, և ամեն ինչ քրեական գործի նյութերում է, թե՛ հիմնական, որը գնացել է դատարան, թե՛ անջատված մասի գործի նյութերում է: Ես 27–ով ասել եմ այնքան, ինչքան ասել եմ: Ավելին ես էս պահին չեմ կարող ավելացնել:

– Բայց ասվում է, որ իրական մեղավորները պատժված չեն:
– Ես ասացի Ձեզ. ամեն ինչ քրեական գործի մեջ է: Ջհանգիրյանն իր գզրոցում, բարձի տակ որևէ բան չի պահել:

– Պարոն Ջհանգիրյան, իսկ խորհրդարանում Ձեր ներկա գործունեությունից գո՞հ եք, և ի՞նչ ուղերձով եք գնում խորհրդարան այսօր:
– Ես, ճիշտն ասած, չեմ վառվում պատգամավոր դառնալու ցանկությամբ, և դա իմ կյանքի նպատակը երբեք չի եղել: Չեմ կարող գոհ լինել իմ խորհրդարանական գործունեությունից, որովհետև մենք բազմաթիվ ծրագեր ունեինք, որոնց ճնշող մեծամասնությունը չկարողացանք իրականացնել, քանի որ փոքրաթիվ էինք: Բայց կարծում եմ, որ որպես իրավագետ, իմ ուժերի ներածին չափ փորձել եմ օգտակար լինել ԱԺ–ի օրենսդրական, վերահսկողական գործունեությանը: Իսկ մեր նոր անելիքը նշված է նախընտրական ծրագրերում»:

Շարունակությունը' «Փաստ» օրաթերթի այսօրվա համարում: