Ռաուլը կաշխատանի «Ռեալ»-ում

Իսպանիայի ազգային հավաքականի և Մադրիդի «Ռեալ»-ի նախկին ֆուտբոլիստ Ռաուլ Գոնսալեսը աշխատանքի կանցնի  հարազատ թիմում: Այս մասին գրում է իսպանական Onda Cero կայքը:

Մադրիդյան ակումբի նախկին հարձակվողը կլինի «Ռեալ»-ի նախագահ Ֆլորենտինո Պերեսի օգնականը: Նա իր աշխատանքը կսկսի 2017 թվականի հունիսին:

40-ամյա Ռաուլն այժմ իսպանական պրոֆեսիոնալ լիգայի դեսպանն է ԱՄՆ-ում, սակայն արդեն տեղեկացրել է, որ պատրաստվում է լքել պաշտոնը:

«Նախկինում ասել եմ, որ միակ իսպանական ակումբը, որում հանդես կգամ, «Ռեալ»-ն է: Եվ եթե աշխատեմ Իսպանիայում, ապա միայն մադրիդյան թիմում: Հուսով եմ՝ դա շուտ տեղի կունենա»,- հատարարել է մադրիդյան թիմի նախկին ավագը:

Ռաուլը «Ռեալ»-ի սան է, որտեղ հանդես է եկել 16 տարի: Նա 6 անգամ դարձել է Իսպանիայի չեմպիոն, 3 անգամ հաղթանակ է տարել Չեմպիոնների լիգայում: Մադրիդյան թիմում անցկացրած խաղերի քանակով ռեկորդակիր է (741) և Կրիշռտիանու Ռոնալդուից հետո՝ թիմի պատմության երկրորդ լավագույն ռմբարկուն է (323):