Արման Սահակյանի շտաբներից մեկում կնոջ դի է հայտնաբերվել (Թարմացված)

Հասրաթյան 14 շենք բնակարաններից մեկում հանկարծամահ է եղել 1940 թվականին ծնված մի կին: Այս մասին ԼՈւՐԵՐ.com-ի թղթակցի հետ զրույցում հայտնեց ՀՀ Ոստիկանության ԶԼՄ-ների հետ կապի, վերլուծության և լրատվության բաժնի պետ Էդգար Ջանոյանը:

Նրա խոսքով՝ այսօր, ժամը 13:50-ին Ոստիկանությունն ահազանգ է ստացել շտապօգնությունից, որ շտապօգնության աշխատախումբը կանչով մեկնել է Հասրաթյան 14 շենք:

Ըստ մամուլում տարածված տեղեկությունների՝ նշված վայրը օգտագործվում է ինչ-որ տուրիստական ընկերության կողմից, սակայն այս օրերին գործել է որպես ռեյտինգային ցուցակով ԱԺ պատգամավորի թեկնածու Արման Սահակյանի նախնըտրական շտաբ:

Այնտեղ հայտնաբերել են 77-ամյա Սուսաննա Հարությունյանի դին: 

Ըստ դատաբժշկի նախնական եզրակացության՝ կինը հանկարծամահ է եղել:

Քաղաքացիներն ասել են, որ մինչ դին կտեղափոխեին՝ շտաբականները Արման Սահակյանի նկարներով բոլոր պաստառները հեռացրել են շենքի վրայից:

Թարմացված

Ավելի ուշ ՀՀԿ ռեյտինգային ցուցակով ԱԺ պատգամավորի թեկնածու, ԱԺ նախագահ Գալուստ Սահակյանի որդի Արման Սահակյանը 168.am-ի հետ զրույցում ներկայացրել է՝ ինչ հանգամանքներում է նախընտրական իրենց շտաբում մահացել 77-ամյա Սուսաննա Հարությունյանը։

«Ընտրատարածքի հարակից տարածքում ապրող բնակչուհի է եղել, եկել է ընտրությունների, այդ ճանապարհին վատ է զգացել իրեն, մեր ներկայացուցիչները փորձել են առաջին օգնությունը ցուցաբերել։ Տարել են մեր շտաբ, զանգել են շտապօգնություն, բայց, ցավոք, հնարավոր չի եղել կյանքը փրկել»,- պարզաբանել է նա:

Սոնա Հարությունյան