Եվրահանձնաժողովի դիմաց ցուցարարները կոչ են արել Թուրքիային՝ ազատել բանտարկված իրավապաշտպաններին

Բրյուսելում Եվրահանձնաժողովի գրասենյակի դիմաց մի խումբ անձինք բողոքի ցույց են իրականացրել՝ կոչ անելով Թուրքիային ազատ արձակել հուլիսի սկզբին այդ երկրում բանտարկված իրավապաշտպաններին: Այս մասին հայտնում է թուրքական Diken-ը:

Բողոքի ակցիան կազմակերպել է միջազգային իրավապաշտպան Amnesty International կազմակերպությունը: Ցուցարարները պահել են պաստառներ կալանավորված իրավապաշտպանների անուններով, ինչպես նաև հետևյալ գրություններով. «Թուրքիա, ազատ արձակիր իրավապաշտպաններին», «Թուրքիա, դադարեցրու ճնշումները»:

Ստամբուլում հուլիսի 5–ին ձերբակալված տասն իրավապաշտպաններից վեցը՝ Իդիլ Էսերը, Օզլեմ Դալքըրանը, Վելի Աջուն, Գյունալ Քուրշունը, Ալի Գարավին և Պետեր Ստոյդթները կալանավորվել են, չորսը՝ ազատ արձակվել:

Իրավապաշտպանները մեղադրվում են «ահաբեկչական խմբավորման անդամ լինելու» մեջ: Ձերբակալվածների շարքում են միջազգային Amnesty International կազմակերպության Թուրքիայի գրասենյակի ղեկավարն ու նույն կազմակերպության աշխատակիցը:

Գերմանիան Թուրքիայի դեսպան Ալի Քեմալ Այդընին հուլիսի 19-ին կանչել էր արտաքին գործերի նախարարություն և բողոքի նոտա հղել պաշտոնական Անկարային՝ կապված Ստամբուլում գերմանացի իրավապաշտպան Պետեր Ստոյդթներին ձերբակալելու, ապա նաև կալանավորելու հետ: Գերմանիայի արտաքին գործերի նախարարության խոսնակ Մարտին Շեֆերը հայտնել է, որ դեսպանին պարզ լեզվով ասել են, որ առանց ժամանակ կորցնելու թուրքական կողմն ազատ արձակի Գերմանիայի քաղաքացի Ստոյդթներին:

Գերմանիայի արտգործնախարար Զիգմար Գաբրիելը իրավապաշտպանի կալանավորումից հետո կիսատ է թողել արձակուրդն ու վերադարձել է Բեռլին: