Բուժումը սկսելուց 1 ամիս հետո հեպատիտ C-ով հիվանդների 85 տոկոսը Հայաստանում ազատվել է վիրուսից

Հեպատիտ C-ով հիվանդների 85 տոկոսը Հայաստանում ազատվել է վիրուսից հակավիրուսային բուժումը սկսելուց 1 ամիս հետո: 6 հիվանդի բուժում դադարեցվել է՝ բարդություններից խուսափելու նպատակով, նրանց փոխարեն սպասարկվում են  6 այլ հիվանդներ:Հուլիսի 27-ին՝ Հեպատիտի դեմ պայքարի համաշխարհային օրվան ընդառաջ լրագրողների հետ հանդիպմանն այս մասին ասաց ՀՀ ԱՆ գլխավոր հեպատոլոգ Հասմիկ Ղազինյանը:

«Բուժումն իրականացվում է «Սովալդի» դեղով, սակայն քանի որ միայն այդ դեղը չի կարող գործել որպես հակավիրուսային, այն գործում է կոմբինացիայի ձևով: Կոմբինացիան կազմում է նույն խմբի մեկ այլ դեղ՝  «Դակլատասվի»-ն: Բուժումը սկսել ենք մայիսից, ընդհանուր տևողությունը 3 ամիս է: Բուժումն ունի մշտադիտարկման անհրաժեշտություն՝ թե արդյունավետության, թե դեղամիջոցի անվտանգության առումով: Բուժումից 8 շաբաթ հետո՝ այսինքն 1 տուփի ավարտից հետո, բոլոր հիվանդները հանձնում են երեք խիստ կարևոր անալիզ: Բուժումը սկսելուց 1 ամիս հետո 854 հիվանդ՝ այսինքն 85 տոկոսը, ազատվել է վիրուսից»,-ասաց Հասիկ Ղազինյանն ու նշեց, որ, այնուամենայնիվ, բուժումը շարունակվում է թե՛ բացասական, թե դրական արդյունքների դեպքում:

Նրա խոսքով, որպես կանոն, հիվանդների 100 տոկոսն ազատվում է վիրուսից բուժումը սկսելուց 2 ամիս հետո:  Բուժումն ավարտելուց հետո հիվանդները նորից կհետազոտվեն վիրուսի առկայությունը պարզելու համար: Դրանից  հետո բուժում ստացածները կշարունակեն գտնվել դիսպանսեր հսկողության տակ: Իսկ ցիռոզի ստադիայում բուժումը սկսածների մշտադիտարկումը կտևի 1 տարի ժամանակահատվածում:

«Բուժման ընթացքում դադարեցվել է 6 հիվանդի բուժում:  3 հիվանդի՝ ցիռոզի դեկոմպենսացիայի պայմաններում կլինիցիստների խումբը դադարեցրել է հակավիրուսային բուժումը, մնացած 3 հիվանդի բուժումը դադարեցվել է օրգանիզմի կողմից դեղը չընդունելու պատճառով: Այս 6-ի  փոխարեն նոր  հիվանդներ են սպասարկվում հակավիրուսային բուժումով»,-ասաց Ղազինյանն ու հավելեց, որ բուժման ընթացքում 1 հիվանդ մահացել է՝ ուղեղի ինսուլտի պատճառով, որը կապ չունի դեղորայքի հետ: 

Ամբողջ աշխարհում կա հեպատիտ B-ով 250 մլն խրոնիկ վիրուսակիր, հեպատիտ C-ով՝ 180 մլն խրոնիկ հիվանդ: Տարեկան մահացությունը կազմում է մինչև 1,5 մլն՝ վիրուսային հեպատիտներից կողմից առաջացրած բարդությունների պատճառով, որոնցից են լյարդի ցիռոզը, լյարդի առաջնային ուռուցքը:  Առ այսօր արձանագրվում են հեպատաիտ C-ով 3-4 մլն վարակելիության նոր դեպքեր: