Արցախում մեկնարկել են ուսուցիչների վերապատրաստման դասընթացները

«Գիտելիքը ուժ է» կրթական նախաձեռնության շրջանակում այսօր Արցախում մեկնարկել են ուսուցիչների վերապատրաստման դասընթացները, որոնք նախատեսված են Ստեփանակերտի, ինչպես նաև Մարտունու շրջանի գյուղական համայնքների և Մարտունի քաղաքի միջին և ավագ դպրոցների ֆիզիկայի, քիմիայի,կենսաբանության, մաթեմատիկայի, ինֆորմատիկայի ուսուցիչների, ինչպես նաև դասվարների և հումանիտար առարկաների մասնագետների համար:

Այս  մասին   «Արցախպրես»-ի թղթակցի  հետ  զրույցում  ասել  է  «Գիտելիքը ուժ է» կրթական նախաձեռնության հեղինակ Անուշ Եդիգարյանը՝ նշելով,  որ դասընթացները կազմակերպվում են Հայաստանից ժամանած մի խումբ մասնագետների նախաձեռնությամբ:

«Արցախի կառավարության ներկայացուցիչների հետ հանդիպումների ժամանակ միշտ կարևորվել է ժամանակակից մեթոդներով դասավանդման հարցը, և  մենք  էլ   որոշել ենք   համատեղ ուժերով սկսել այս նախաձեռնությունը: Փորձառու մասնագետները ոչ միայն կներկայացնեն կրթության ժամանակակից մոտեցումները, այլև պրակտիկ կիրառության գործնական պարապամունքներ կանցկացնեն: Եթե ուզում ենք կրթության ոլորտում առաջընթաց ապահովել՝ ժամանակակից մեթոդների կիրառումը պարզապես անհրաժեշտություն է: STEM-ը (Science, Technology, Engineering, Math, կամ՝ գիտություն, տեխնոլոգիա, ճարտարագիտություն, մաթեմատիկա) ներկայումս համարվում է համաշխարհային կրթության  հիմնական միտումներից  մեկը, քանի որ ժամանակակից աշխարհում ամենապահանջվածներից են դառնում նշված ոլորտների գիտելիքները»,- հավելել  է  Ա. Եդիգարյանը:

«Մենք      փորձում  ենք    Արցախում կրթության զարգացման գործում մեր ներդրումն ունենալ: Ուսուցիչների    վերապատրաստման  ծրագիրը   հավանության   է    արժանացել Արցախի կրթության, գիտության և սպորտի նախարարության   կողմից: Այս կրթական նախաձեռնության նպատակն է  ուսուցիչների  ուշադրությունը հրավիրել ժամանակակից այն մեթոդների վրա, որոնք ներկայումս կիրառվում են աշխարհի առաջատար երկրների կրթական համակարգում, ինչպես  նաև՝ երեխաների շրջանում հետաքրքրություն առաջացնելն այն առարկաների նկատմամբ, որոնք ընկածեն լինելու մասնագիտական  կողմնորոշման հիմքում,-ասել  է  Ա. Եդիգարյանը  և   ավելացրել,-ուսուցիչների վերապատրաստման դասընթացների հաջորդ փուլը  տեղի է ունենալու Ստեփանակերտում՝ օգոստոսի 8-9-ին: Դասընթացներին  կմասնակցի շուրջ 120 ուսուցիչ»:

Կազմակերպիչները համոզված են, որ դասընթացները ոչ միայն անհրաժեշտ գիտելիքներ կփոխանցեն, այլև կնպաստեն տարբեր դպրոցների ուսուցիչների միջև համակարգված համագործակցությանը՝ ստեղծելով ժամանակակից կրթական տեխնոլոգիաների և մեթոդների քննարկման հարթակ:

Վերապատրաստման ծրագիրը հագեցած է գործնական, խմբային և հետազոտական բնույթի հանձնարարություններով։ Հատկապես շեշտադրվում են STEM   կրթության մոտեցումները, որոնք նպաստում են աշակերտների հետազոտական և վերլուծական մտքի, համագործակցության կարողությունների զարգացմանը և օգնում են ժամանակակից աշխարհում պահանջված մասնագիտությունների ընտրության հարցում։

Ա.  Եդիգարյանի  խոսքով՝   ծրագրով վերապատրաստված ուսուցիչներից ոմանք նաև կդասավանդեն  «Գիտելիքը ուժ է» նախաձեռնության շրջանակում  Արցախի Մարտունու շրջանում կազմակերպվելիք համանուն ամառային դպրոցում, որը կմեկնարկի օգոստոսի 1-ից: