Կամո Հովհաննիսյանը՝ «Ալաշկերտ»-ի ֆուտբոլիստ (տեսանյութ)

Հայաստանի ազգային հավաքականի կիսապաշտպան Կամո Հովհաննիսյանը տեղափոխվեց Երևանի «Ալաշկերտ»: Այս մասին տեղեկացնում է հայկական ակումբի կայքը:

Կամո Հովհաննիսյանի հետ պայմանագիրը նախատեսված է մինչև 2020 թվականի օգոստոսի 1-ը: «Ալաշկերտ»-ի նորեկն արդեն իր առաջին մարզումն է անցկացրել թիմի կազմում:

25-ամյա ֆուտբոլիստի նախորդ ակումբը Բելառուսի բարձրագույն խմբում հանդես եկող «Տորպեդո-ԲելԱԶ»-ն էր, որի կազմում անցկացրած առաջնության 28 խաղում Հովհաննիսյանը դարձել էր 3 գոլի և նույնքան գոլային փոխանցման հեղինակ: 1 գոլ էլ Կամոն հեղինակել է Բելառուսի գավաթի խաղարկության 3 հանդիպումներում: Թիմի երկրպագուների կարծիքով՝ Կամո Հովհաննիսյանը ճանաչվել է Բելառուսի նախորդ առաջնությունում «Տորպեդո-ԲելԱԶ»-ի լավագույն խաղացողը: 10 հանդիպումում նա ճանաչվել է լավագույն ֆուտբոլիստ, 14 խաղում հայտնվել լավագույն եռյակում:

Պայմանագրի ժամկետի ավարտից հետո բելառուսական ակումբի ղեկավարությունը բարելավված պայմաններով համաձայնագիր չէր առաջարկել հայ ֆուտբոլիստին, ով նախընտրել է վերադառնալ հայրենիք և կարիերան շարունակել Հայաստանի չեմպիոնի կազմում:

«Ուրախ եմ «Ալաշկերտ»-ի հետ պայմանագիր ստորագրելու կապակցությամբ և ցանկանում եմ բազմաթիվ հաջողություններ արձանագրել իմ նոր թիմի կազմում` ինչպես Հայաստանում, այնպես էլ` եվրոպական ակումբային մրցաշարերում: Շատ լավ եմ ճանաչում թիմակիցներիս, որոնց հետ հանդես եմ եկել տարբեր տարիքային հավաքականներում»,- նշել է Հովհաննիսյանը: