Ադրբեջանում տղամարդը ինքնահրկիզվել է

16 Հունվար, 2018 15:01

Ադրբեջանի Աղդաշի շրջանում հունվարի 15-ին ինքնահրկիզվել է նույն շրջանի 37-ամյա բնակիչ Գասանգա Սեխբյատովը: Այս մասին հայտնում է ադրբեջանական 1news.az –ը:

Ինքնահրկիզման պատճառ է հանդիսացել այն հանգամանքը, որ ոստիկանները ցանկացել են նրա մեքենան տեղափոխել ոստիկանության տուգանային հրապարակ:

Սեխբյատովի մեքենան տուգանային հրապարակ տեղափոխելու պատճառ է հանդիսացել վարորդի առանց բանկի կողմից տրամադրված լիազորագրի այն վարելը:

Սեխբյատովը չէր կարողացել մարել բանկային պարտքերը, և նրա մեքենան դատարանի որոշմամբ կալանքի տակ էր վերցվել:

Սեխբյատովը որպես բողոքի նշան տեղում իր վրա բենզին է լցրել և ինքնահրկիզվել:

Ոստիկաններին և դեպքի վայրում հավաքված մարդկանց հաջողվել է մարել կրակը, ինչից հետո տղամարդը տեղափոխվել է հիվանդանոց:

Տղամարդու վիճակը գնահատվել է միջին աստիճանի ծանրության, և նրա կյանքին վտանգ չի սպառնում:

Ադրբեջանական հոգեբանների կարծիքով, ինքնասպանությունների, այդ թվում ինքնահրկիզման թվի մեծացման պատճառը կապված է նաեւ սոցիալ-տնտեսական իրավիճակի վատթարացման հետ: Մասնավորապես, այդ երկրում ինքնասպանությունները հաճախակիացել են տնտեսական ճգնաժամի ֆոնին մարդկանց ունեցած վարկային պարտքերի պատճառով:

2018-ի հունվարի 10-ին բանկին ունեցած պարտքերի պատճառով Ադրբեջանի Մասալիի շրջանի Շարաֆ գյուղի բնակիչ Ռագիֆ Զեյնալովն ինքնահրկիզվել էր շրջանային դատարանի շենքի առջև:

2017 թ. մայիսին Ադրբեջանում գործող Bank Respublika-ի մասնաճյուղերից մեկի առջև Բաքվի քաղաքացի Ռամիզ Մանաֆովը ինքնահրկիզվել էր բանկին ունեցած պարտքերի պատճառով: