Վստահ եմ՝ այն աստիճան միակուսակցական համակարգ չի լինի, ինչ եղել է 20 տարի ՀՀԿ-ի օրոք. Հրաչյա Հակոբյան (տեսանյութ)

Վարչապետ Նիկոլ Փաշինյանը հրաժարականի ճանապարհով խորհրդարանի լուծարմանը հասնելու իր որոշումը համաձայնեցրել է թիմակիցների հետ: Այս մասին Factor.am-ի հետ զրույցում հայտարարել է ԱԺ «Ելք» խմբակցության պատգամավոր Հրաչյա Հակոբյանը:

«Նման որոշումները կայացնում է ոչ թե ամբողջ կուսակցությունը, այլ վարչությունը, իսկ վարչությունում կարծում եմ՝ եղել է այդ համաձայնությունը»,- նշել է պատգամավորը՝ հավելելով, որ որոշումը կայացվել է երկար ծանրութեթև անելուց հետո:

Հակոբյանի փոխանցմամբ՝ կուսակցության վարչության կազմն արդեն քննարկում է ցուցակների հարցը և որոշում, թե ինչ սկզբունքով է այն կազմվելու: Պատգամավորը նաև չի բացառել ընտրություններին դաշինքով մասնակցելու հնարավորությունը:

«Վարչությունը քննարկում է, թե որ ուժերի հետ կարող ենք դաշինքով մասնակցել ընտրություններին, եթե, իհարկե, դաշինքով ենք մասնակցում»,- շարունակել է Հրաչյա Հակոբյանը:

Անդրադառնալով այս օրերին հնչող մտահոգություններին, որ Հայաստանը գնում է դեպի միակուսակցական համակարգ՝ «Ելք» խմբակցության պատգամավորը հակադարձել է.

«Վստահ եմ՝ այն աստիճան միակուսակցական համակարգ չի լինի, ինչ եղել է 20 տարի ՀՀԿ-ի օրոք: Այդ տարիներին քաղաքական բոլոր գործողությունները պտտվում էին ՀՀԿ-ի շուրջ և անցնում էին Մելիք-Ադամյանով»:

Հարցազրույցն ամբողջությամբ՝ Factor.am-ի  տեսանյութում: