«Բացի ինձնից էլի մարդկանց են ահաբեկել, այցելել են մարդկանց տներ և ասել՝ մեր մեջքը Նիկոլ Փաշինյանն է»․ Գևորգ Մանուկյան (տեսանյութ)

Ինչպես արդեն տեղեկացրել էինք՝ Արմավիրի մարզի Էջմիածնի քաղաքապետի ժամանակավոր պաշտոնակատար, քաղաքապետի թեկնածու Դիանա Գասպարյանի հայրը սպառնացել էր քաղաքացի Գևորգ Մանուկյանին ասելով՝ «կգամ ոտերդ կջարդեմ, այ ոչխար»։ Պատճառը եղել է Մանուկյանի ֆեյսբուքյան մեկնաբանությունը։ Սա «Նոր Հայաստանում» նոր իրողություն է, երբ մարդուն ֆեյսբուքյան մեկնաբանության համար նման սպառնալիքներ են հնչեցնում։

ԼՈՒՐԵՐ․com-ի թղթակիցը զրուցեց Գևորգ Մանուկյանի հետ, որն, ի դեպ, այս պահին ապրում է Ֆրանսիայում։

Մանուկյանը նշեց, որ Դիանա Գասպարյանին նախկինում չի տեսել, չնայած՝ հնարավոր է տարիներ առաջ հանդիպած լինեն, երբ ինքը բնակվել է մորաքրոջ տանը, որի թաղամասում էլ բնակվել է նաև Դիանա Գասպարյանը։ Ներկայացնելով ողջ եղելությունը, Մանուկյանը պատմեց․

«Նախկինում ժողովրդին միանգամյա օգտագործում էին 10 000 դրամով, իսկ հիմա Դիանա Գասպարյանն այդ նույն ժողովրդին միանգամյա փորձում է օգտագործել հեղափոխությունով, բայց հեղափոխության հետ նա ընդհանրապես կապ չունի։ Ես նախքան սա լռել եմ։ Նիկոլ Փաշինյանը երեկ պետք է գնար Էջմիածին՝ Ֆեյսբուքում Նիկոլ Փաշինյանի էջում գրել եմ՝ մի արա՛, Նիկոլ ջան, Դիանան եղել է նախկին իշխանությունների կամակատարը ու «Մարտի 1» է խեղաթյուրում, այսինքն  նոր հոդված է գցում ջեբս։ Դրանից հետո Դիանայի հայրը «մեսենջերով» զանգահարում է ինձ։ Ես ինձ համարում եմ այս պայքարի հիմնադիրներից մեկը։ Պայքարի ամեն տեսակ տեսել եմ՝ փողոցում քնել, վրանի տակ քնել, 2004-ին՝ Բաղրամյան պողոտայում ծեծվել եմ։ Այսօր հեղափոխական են իրենց վերագրում այն մարդիկ, ովքեր ժամանակին մեզ ձեռք էին առնում, ասելով, թե բան չի փոխվելու։ Ստացվում է՝ ոնց որ էշերն աշխատեն՝ ձիերն ուտեն։ Այսօր՝ անկախ իմ կամքից, հայտնվել եմ Հայաստանի սահմաններից դուրս, ինձ ասում են՝ արի հետ՝ Հայաստան։ Հիմա ուզում եմ հասկանալ՝ Հայաստանում լավա՞ է, արժե՞ գալ, թե՞՝ չէ, փաստորեն, համոզվեցի, որ ոչ մի բան էլ լավ չի, ոնց կար՝ այդպես էլ մնացել է։ Շանտաժի նման դեպքեր եղել են նախորդ իշխանության ժամանակ», - ասաց Մանուկյանը և հավելեց․ «Եթե Դիանան ունենար փաստ, որ այդտեղ նա ճիշտ է, կամ հայրը ճիշտ է, նա ներողություն չէր խնդրի, մարդիկ իրենց սխալի համար անգամ ներողություն չեն խնդրում, ճիշտ լինելուց ներողություն կխնդրե՞ն»։ 

Հարցին՝ ո՞րն է ամեն դեպքում նրա զայրույթի պատճառը՝ Մանուկյանը նկատեց, որ Դիանա Գասպարյանը նախկինում աշխատել է դատավորի գործավար, այն նույն դատարանում, որտեղ իրեն են դատել քաղաքական հայացքների համար, և տիրապետել է տեղեկությունների, որոնք կարող էին օգնել «Մարտի 1»-ի բացահայտմանը․ 

«Դիանան հայտարարում է Էջմիածինցիներին, որ այդ դատարանում միայն խանութից գողություն անողներն են դատվել։ Ես դատվել եմ էդ դատարանում։ Իմ վրա մարտի 1-ին խանութից գողության հոդված չի եղել, իմ վրա եղել է զանգվածային անկարգությունների հոդված։ «Նոր Հայաստանում» այդ հոդվածը բերում՝ գցում ջեբս, որ ի՞նչ անի։ Էդ դատարանում ինձնից բացի շատ քաղբանտարկյալներ են դատվել, այսինքն բոլորի վրա է տարածվում խանութից գողություն անողի հոդվածը»,-ասաց Մանուկյանը։

Ըստ Մանուկյանի դատարանում աշխատանքի անցնելու համար Դիանա Գասպարյանին օգնել են իր կապերը՝ նրա ազգականը՝ Ալվինա Գյուլումյանը, որը Ռոբերտ Քոչարյանի հրամանով 2003-14 թիվը աշխատել է Եվրոպական դատարանում։ Ինչպես նաև նրա անունը կապում են Հայ Ազգային Կոնգրեսի հետ․ «Հիմա մի գործոն կա խանութից գողություն անելու թեման իրեն ուղղորդում է՝ կա՛մ ՀԱԿ-ը, կա՛մ իր ծանոթ Ալվինան»։

Այս հարցը բարձրացնելով՝ ի՞նչ ակնկալիքներ ունի հարցին՝ Մանուկյանը պատասխանեց․

«Հստակ պահանջներ ունեմ․ Դիանա  Գասպարյանի հոր նման վարքագծով մարդկանց տեղը մեկուսարանն է։ Ես լսել եմ, որ բացի ինձնից էլի մարդկանց են ահաբեկել, այցելել են մարդկանց տներ և ասել՝ մեր մեջքը Նիկոլ Փաշինյանն է, փաստորեն համոզվեցինք, որ այս մարդիկ «շուն չդարձած պատերին են միզում»։ Նա դեռ ընտրված քաղաքապետի հայր չէ, դեռ պարզ էլ չէ կընտրվի, թե՝ չէ, բայց իրեն արդեն դնում ա Մանվելի տեղը։ Բայց դա նորմալ է Էջմիածնում, որովհետև ժողովուրդը դա է տեսել»։

Հետագա անելիքների, մասնավորապես, Հայաստան վերադառնալու հետ կապված Մանուկյանն ասաց․ «Հիմա ավելի քիչ ցանկություն ունեմ վերադառնալ Հայաստան, քան՝ երեկ։ Ես տեսա այն, ինչ Քոչարյանի կամ Սերժի ժամանակ է եղել, երբ մարդկանց զանգում շանտաժ էին անում։ Եթե փոփոխության մասին եք հարցնում՝ փոխվել է այնքանով, որ 5 տարի առաջ ոչ ոք ինձ չէր զանգում շանտաժ անում, հիմա՝ զանգում են»։

Ամփոփելով՝ Մանուկյանը նշեց, որ բազմիցս համացանցում ասել է և կրկնում է, որ իր քաղաքապետի թեկնածուն Առաքել Մովսիսյանն է, որը հանրությանը առավել հայտնի է «Շմայս» մականվամբ։

«Իմ քաղաքապետի թեկնածուն Շմայսն է։ Նա անառակ որդու վերադարձի նման դարձի է եկել։ Իսկ իրենք հիմա էլ, անգամ, «պրիզնատ» չեն գալիս, որ նախկին իշխանությունների կամակատար են եղել»,- կես կատակ, կես լուրջ ասաց Մանուկյանը։

Արմինե Արմենակյան