Իրանը կտրականապես մերժեց քիմիական զենքի ծրագիրը շարունակելու ԱՄՆ-ի մեղադրանքները

Թեհրանը մերժել է Վաշինգտոնի կողմից ներկայացված այն մեղադրանքները, թե Թեհրանն իբր ՄԱԿ-ին ամբողջությամբ չի ներկայացրել քիմիական զենքի իր հզորությունները եւ շարունակում է դրա արտադրության ծրագիրը: Ինչպես հայտնել է Al Arabiya հեռուստաալիքը, այս հայտարարությամբ նոյեմբերի 23-ին հանդես է եկել Իրանի արտաքին գործերի նախարարության պաշտոնական ներկայացուցիչ Բահրամ Քասիմին:

«Թեհրանը կտրականապես մերժում է այդ մեղադրանքները»,-ասել է Քասիմին: «Իրանի հասցեին հնչող նմանօրինակ հայտարարությունները բացարձակապես անհիմն են»,-հավելել է նա: Նոյեմբերի 22-ին Քիմիական զենքի արգելման կազմակերպությանն (ՔԶԱԿ) առընթեր ԱՄՆ-ի մշտական ներկայացուցիչ Քենեթ Ուորդն անհանգստություն է հայտնել այն բանի առնչությամբ, որ Իրանը, Վաշինգտոնի կարծիքով, պահպանում է քիմիական զենքի ծրագիրը, որը չի հայտարարվել ՔԶԱԿ-ում: Ուորդը հայտարարել է, որ, Միացյալ Նահանգների տվյալներով, «Իրանը ամբողջությամբ չի հայտարարագրել քիմիական զենքի արտադրության իր հնարավորությունները, մասնավորապես, զինամթերքը թունավոր նյութերով հանդերձելու մասով»:

ԱՄՆ-ի ներկայացուցչի պնդմամբ, Իրանի նման հնարավորությունների առկայության մասին վկայում են Լիբիայում հայտնաբերված զինամթերքը, հաղորդել է ՏԱՍՍ-ը: