Երբևէ չեմ սպասարկել որևէ մեկի անձնական շահը. Տիգրան Ուրիխանյան (տեսանյութ)

Արաբկիր, Աջափնյակ, Դավթաշեն վարչական շրջաններն ընդգրկող թիվ 2 ընտրատարածքում «Բարգավաճ Հայաստան» կուսակցությունից որպես ռեյտինգային թեկնածու առաջադրված Տիգրան Ուրիխանյանն այս օրերին հանդիպումներ է ունենում բնակիչների հետ: Այսօր՝ նոյեմբերի 30-ին, պատգամավորի թեկնածուն հանդիպում-քննարկում ունեցավ Աջափնյակի՝ իր կողմնակիցների ու համախոհների հետ:

Հանդիպումն անցավ մտերմիկ, ոչ ստանդարտ ձևաչափով. Ուրիխանյանը նախևառաջ ներկայացրեց իր անելիքները խորհրդարանում լինելու պարագայում, ապա պատասխանեց ներկաներին հետաքրքրող հարցերին: Պատգամավորի թեկնածուն խոսեց բնակիչների բարձրաձայնած և նրանց առնչվող խնդիրների լուծման ուղիների մասին՝ խոստանալով հետամուտ լինել դրանց կարգավորմանը:

Ուրիխանյանը խոսեց առաջնահերթ խնդիրների՝ աշխատատեղերի բացման, ուսանողական վարձավճարների, ներդրումների և մի շարք այլ ոլորտներին առնչվող խնդիրների մասին, որոնց այսօր բախվում է Հայաստանի բնակչությունը:

«Այն բացասական երևույթները, որոնք կային նախկինում՝ բոլորիս կյանքում, հույս ունենք, որ այլևս չեն լինի: Մարդիկ կունենան առողջ, ապահովված, բարոյապես բավարար կենսակերպ, մաքուր, սիրուն, կարգավորված պետություն: Հույսերն իրականացնելու համար անհրաժեշտ է արտահերթ խորհրդարանական ընտրություններում ընտրել այնպիսի խորհրդարան, որի կազմում կաշխատեն այնպիսի պատգամավորներ, որոնք այս գծով կգնան»,- ասաց Տիգրան Ուրիխանյանը՝ անդրադառնալով ընտրություններին մասնակցող յուրաքանչյուր քաղաքական ուժի գործունեությանը: 

Ուրիխանյանը բացատրեց, թե ինչու է առաջադրվել հենց «Բարգավաճ Հայաստան» կուսակցությունից՝ ընդգծելով, որ պատասխանը մեկն է. «Ես «Բարգավաճ Հայաստան»-ի ցուցակով եմ 2012թ. անցել խորհրդարան, խմբակցության կազմում եմ ընդունել, անցկացրել կամ փորձել անցկացնել այն օրինագծերը, որոնք դրական կարծիք են ձևավորել ընտրողների մոտ: Եվ վերջապես՝ մեկ ու կես տարուց ավելի՝ աշխատել եմ «Ծառուկյան» դաշինք խմբակցությունում: Երբևէ ո՛չ քվեարկությամբ, ո՛չ ելույթով, ո՛չ էլ դրսում կատարած աշխատանքով չեմ սպասարկել ոչ իմ, ոչ թիմից որևէ մեկի և ոչ էլ՝ Գագիկ Ծառուկյանի անձնական շահը, այլ բացառապես հանրությանը վերաբերող խնդիրներ եմ շոշափել և շատ հարցերի լուծումներ տվել»,- նշեց պատգամավորի թեկնածուն:

Նա նկատեց՝ եթե դա դրական է, ուրեմն պետք է հաշվի առնել, որ իր խորհրդարանական կենսագրությունը ԲՀԿ-ի հետ է կապված: 

Մանրամասները՝ տեսանյութում: