Մաքսազերծման փոփոխությունների շղթայական ռեակցիան

ՀՀ պետական եկամուտների կոմիտեի որոշման համաձայն, այս տարվա հունվարի մեկից՝ մեքենաների մաքսազերծումը կատարվում է միայն մաքսային ծառայության կողմից սահմանված մաքսատուրքերով, ինչը նշանակում է, որ հնարավոր չի լինելու մաքսազերծումը կատարել մեքենայի առուծախի փաստաթղթերի հիման վրա։ 

Չնայած նրան, որ ՊԵԿ նախագահ Դավիթ Անանյանը ճեպազրույցի ժամանակ նշեց մաքսազերծումը նաև ինվոյսով լինելու մասին, որի նպատակն է վերահսկել մեքենաների իրական գները, այնուամենայնիվ, մասնագետները սահմանված մաքսատուրքերի մասով խնդիրներ են տեսնում:

Տնտեսագետ, փորձագետ, «Ղեկը աջ» նախաձեռնության անդամ Արթուր Միսակյանը ևս ԼՈՒՐԵՐ.com-ի հետ զրույցում նշեց, որ սահմանված մաքսատուրքերը խնդիր են, քանի որ այդպիսով թարմ մեքենաների ներկրումը մեծ բեռ է դառնում ինչպես անձնական օգտագործման մեքենաներ գնելու, այնպես էլ դրանց առուծախով զբաղվող քաղաքացիների համար: 

«Մի շարք պետություններում խրախուսվում է թարմ մեքենաների ներկրումը, քանի որ դրանց արտանետումները նվազ վտանգ են ներկայացնում: Ժամանակն է, որ ՀՀ կառավարությունը հստակ քաղաքականություն իրականացնի էլեկտրամոբիլների ներկրման ու դրանց շահագործման ուղղությամբ, մեզ մոտ այս մասով որևէ տեղաշարժ չկա»,-մանրամասնեց փորձագետը:

Մեր զրուցակիցը փաստում է, որ 2015թ.-ից հետո արտադրված մեքենաներ գնելն է առավել մեծ խնդիր դառնալու. «Եթե վիճակագրություն կազմենք, կտեսնենք, որ ավտովթարների մեծ մասը տեղի է ունենում հին արտադրության մեքենաների մասնակցությամբ, և դա օր օրի ավելի մեծ խնդիր է դառնում: ՊԵԿ-ը պետք է անընդհատ մոնիթորինգի ենթարկի մեքենաների շուկայական գներն ու մաքսազերծման վճարները պետք է պակասեցնի, ես դեմ եմ առհասարակ ցանկացած թանկացման, եթե մարդկանց եկամուտները համաչափ չեն ավելանում»:

Փորձագետը շեշտում է՝ մեքենաների մաքսազերծման թանկացումն անպայմանորեն մեխանիկորեն բերելու է մեքենաների շուկայական գների բարձրացման 300-1000 դոլարով: 

Արմինե ՄԻՔԱՅԵԼՅԱՆ