Էրդողանը ցայժմ չի կարողացել հաշտվել Եգիպտոսում «Մուսուլման եղբայրների» պարտության հետ

Արաբագետ Արմեն Պետրոսյանն իր ֆեյսբուքյան էջում գրել է․

«2013 թ. Եգիպտոսում տեղի ունենցած ռազմական հեղաշրջումից հետո կտրուկ սրվեցին այդ երկրի նոր իշխանությունների և հատկապես նախագահ Աբդ ալ-Ֆաթթահ ալ-Սիսիի և Թուրքիայի բարձրագույն իշխանությունների հարաբերությունները: Ռեջեփ Թայիփ Էրդողանը ցայժմ չի կարողացել հաշտվել սեփական գաղափարակիցների՝ «Մուսուլման եղբայրների» պարտության հետ առանցքային նշանակություն ունեցող արաբական այդ երկրում:

Եվ անցյալ առնվազն 5 տարիների ընթացքում տարբեր առիթներով պարբերաբար սրվել է Անկարա-Կահիրե բանավոր փոխհրաձգությունը: Այս համատեքստում երկկողմ լարվածության հերթական պատճառ է դարձել 2015 թ. սպանված Եգիպտոսի գլխավոր դատախազի դեմ մահափորձը կազմակերպած 9 երիտասարդների մահապատիժը:

Կոշտ քննադատության ենթարկելով ալ-Սիսիին՝ Էրդողանը մասնավորապես նշել է. «Այժմ ես պատասխանում եմ նրանց, ովքեր հարցնում են՝ ինչու Թայիփ Էրդողանը չի խոսում Սիսիի հետ, բայց ես երբեք չեմ խոսի նրա նման մեկի հետ»: Այսպիսով՝ գնդակն արդեն Եգիպտոսի դաշտում է, և, վստահաբար, պատասխան հարձակումը երկար սպասեցնել չի տա, իսկ առավել գլոբալ առումով թուրք-եգիպտական լարվածությունը զգալի բացասական ազդեցություն է ունենում նաև մերձավորարևելյան տարածաշրջանում ԱՄՆ-ի կողմից համակարգվող մի շարք ծրագրերի, մասնավորապես՝ Իրանի, Պաղեստինի հետ կապված հիմնահարցերի վրա: