Պաշտպանները բողոքարկել են Արամ Դանիելյանին ձերբակալելու որոշումը

Պաշտպանները բողոքարկել են Հրազդանի նախկին քաղաքապետ Արամ Դանիելյանին ձերբակալելու որոշումը: Այս մասին ԼՈւՐԵՐ.com-ի հետ զրույցում ասաց Հրազդանի նախկին քաղաքապետ Արամ Դանիելյանի փաստաբան Ալեքսանդր Սիրունյանը

«Հրազդանի քաղաքապետարանում 3-4 տարի շարունակ գույքահարկի գումարներ հավաքող տեսուչների մոտ առաջացել է գումարի պակասորդ, որը կազմել է մոտավորապես 100 մլն դրամ: Տեսուչները ցուցմունք են տվել, որ թեև գումարներն իրենք իրենց համար են վատնել, բայց արել են Արամ Դանիելյանի ցուցումով»,- ասաց նա՝ նշելով, որ սա ուղղակի զարմանալի է: 

Նրա խոսքով՝ Արամ Դանիելյանն ինքնակամ է ներկայացել քննչական մարմին և պահանջել հարցաքննել իրեն. «Իմ պաշտպանյալն ասել է, որ մի քանի ամիս է գործը քննում են, ինչո՞ւ հարցաքննության չեն կանչում իրեն: Դրանից հետո որոշում են ձերբակալել նրան: Այս գործողությունից հետո Դանիելյանը հրաժարվում է ցուցմունք տալ, սակայն պարզվում է՝ իմ և մյուս պաշտպանի հեռանալուց հետո քննիչը որոշում է հարցաքննություն սկսել և արձանագրություն կազմել առանց պաշտպանների ներկայության»,- նշեց փաստաբանը: 

Ավելի վաղ տեղեկացրել ենք՝ Քննչական կոմիտեի Կոտայքի մարզային քննչական վարչության Չարենցավանի քննչական բաժնում քննվող քրեական գործի նախաքննության ընթացքում, որպես համայնքի ղեկավար պաշտոնավարման տարիներին՝ 2015-2018թթ. ընթացքում, համայնքապետարանի աշխատակազմի հողի հարկի և գույքահարկի գումարներից առանձնապես խոշոր չափերի յուրացումներ և վատնումներ կատարելու կասկածանքով 2019 թվականի փետրվարի 26-ին՝ ժամը 14:10-ին, ձերբակալվել է Կոտայքի մարզի Հրազդան համայնքի նախկին ղեկավար Արամ Ռազմիկի Դանիելյանը: