Հրավիրում եմ «հաց ու պանիր» ուտելու

Առողջապահական համակարգի թվացյալ բարեփոխումների ծրագիրը չի դիմանում քննադատություններին։ Այնպիսի տպավորություն է, որ առողջապահության նախարարն այլևս չի կարողանում վերահսկել իր ֆեյքերի ու փիարշիկների բանակի համակարգված աշխատանքը, քանի-որ ճշմարտությունը օր օրի բացահայտվում է։

Արդեն դժվար է սանավիացիոն ծառայության ստեղծման կեղծ լուրերի փառաբանումը, քանի-որ արդեն հայտարարվել է, որ օդնավակայանում վայրէջք կատարած ուղղաթիռները տուրիստական գործառույթ են իրականացնելու և ծանր վիճակում հիվանդ տեղափոխելու համար նրանց ներքին հարդարանքի փոփոխությունը կասկածի տեղիք է տալիս։ Բայց դե լավ PR-քայլ էր։

Փակուղու առաջ է կանգնել նաև չարորակ նորագոյացությունների վիրահատական անվճար բուժման ծրագիրը, քանի-որ պարզվում է, որ ներկայացված «շուկայական» գներն ամենևին էլ շուկայական չեն և հետ են ուղարվել նախարարություն` փոփոխության ենթարկելու համար։ Բայց դե ժողովուրդը մի հիացավ, մի սիրահարվեց, մի հպարտացավ «բարեփոխ» նախարարով։

Բարեփոխումների թեման կարելի է անվերջ շարունակել, բայց հիմա ուզում եմ կոչ անել կառավարության հնաբնակ, նորանշանակ պարոն Թորոսյանին։

Օրեր առաջ` Ձեր աստղային ասուլիսներից մեկի ժամանակ, խոսում էիք բժշկական հաստատությունների հետ պետ.պատվերի պայմանագրերի կնքման և գումարների բաշխման մասին։ Նշեցիք, որ «գրեթե բոլոր բժշկական հաստատությունները ստացել են ավելի շատ գումար, քան ստացել են 2018 թվականին … նույնիսկ Հանրապետական հիվանդանոցն ա աճել, զարմանալիորեն»։

https://www.youtube.com/watch?v=FiBo0vwgk_A

Պարո՛ն Թորոսյան, ինչպես տեսնում եմ, Դուք ոչ միայն բժշկությունից, այլ նաև բժշկական էթիկայից եք կիլոմետրերով հեռու։

 Դուք գիտե՞ք, թե ինչ մասնագետներ են աշխատել «Արմենիա» հանրապետական բժշկական կենտրոնում։ Ասեմ` իմացեք։ Այդ կլինիկայում աշխատել են այնպիսի մեծանուն բժիշկներ, ինչպիսիք են Ս.Ս.Հովհաննիսյանը, Վ.Թ.Ափոյանը, Պ.Ա.Վարդապետյանը, Ա.Ա.Միդոյանը, և այլոք, ովքեր հանդիսացել են բժշկական իրենց ոլորտների հիմնադիրներ:

Այսօր էլ «Արմենիա» ՀԲԿ-ում աշխատում են պրոֆեսիոնալներ և իրենց մասնագիտությանը նվիրված բուժաշխատողներ։

Այդ մարդիկ վառվում են մոմի նման` լույս տալով բոլորին։ Ստանալով ճղճիմ, նվաստացուցիչ աշխատավարձ` էլի ժպիտով ու սրտացավորեն են մոտենում յուրաքանչյուր հիվանդի։

Ձեր նախորդների շահախնդիր ու կեղտոտ հակափիառը շարունակում եք նաև Դուք։ Դուք նման եք մի հրամանատարի, ով իր վիրավոր զինվորի վերքը վիրակապելու փոխարեն մեջքից կրակում է։ Դա վայել չէ ցանկացած բժշկի, նույնիսկ` Ձեզ, զարմանալիորեն։

Պարոն Թորոսյան, Ձեզ մի օր հրավիրելու եմ հաց ու պանիր ուտելու։ Չնայած, աշխարհում չկա այնքան հաց ու պանիր, որ Դուք ուտեք, ու հասնեք մեր նվիրյալներին։

Մարինա Խաչատրյան