Ռուսաստանի մեսիջը՝ Հայաստանին

«Նախ պետք է գնահատենք այն փաստը, որ Բաքվի երթին մասնակցել են Դումայի պատգամավորները, այլ ոչ թե կառավարության ներկայացուցիչները։ Պատգամավորների ինքնուրույնության աստիճանը բարձր է և դա դեռ չի նշանակում, որ պետական քաղաքականություն է»,- ԼՈւՐԵՐ.com-ի հետ զրույցում տեսակետ հայտնեց քաղաքագետ Ստեփան Դանիելյանը՝ անդրադառնալով ռուս խորհրդարանականների մասնակցությանը Բաքվում կայացած հակահայկական երթին։

 

Նրա խոսքով՝ հասկանալի է նաև, որ պատգամավորների քայլը մեսիջ է Հայաստանին, թեև մյուս կողմից էլ Ռուսաստանը փորձում է Հայաստանի ու Ադրբեջանի միջև հավասարակշռված քաղաքականություն վարել՝ իր ազդեցությունը պահելու համար. «Մեսիջի պահով պետք է փորձել հասկանալ, թե ինչից է դժգոհ Ռուսաստանը։ Կարծում եմ դրա պատասխանը պետք է որոնել ռուսական մամուլում։ Նման դեպքերում մամուլը ասում է այն, ինչը պաշտոնական հարթակներում չի ասվում»,- նշեց Դանիելյանը:

 

Նշենք, որ ռուս պատգամավորների այս քայլին արձագանքել է ՌԴ-ում Հայաստանի դեսպան Վարդան Տողանյանը՝ նշելով, որ միանգամայն անհասկանալի են ռուս խորհրդարանականների պատճառները, որոնցով նրանք հանդես են գալիս Բաքվում և ի՞նչ «առաքելությամբ» են նրանք Բաքվում մասնակցում այդպիսի ակցիայի, որը պետության քարոզչամեքենայի մաս է: 

 

Ռուսաստանի Դաշնային ժողովի Դաշնության խորհրդի լիագումար նիստի ընթացքում ունեցած ելույթում ՀՀ Ազգային ժողովի նախագահ Արարատ Միրզոյանն էլ հայտարարել է. «Ստիպված եմ ցավով արձանագրել, որ չնայած մեր երկրների միջև առկա դաշնակցային հարաբերությունների բարձր մակարդակին, ինչպես նաև Լեռնային Ղարաբաղի հակամարտության խաղաղ կարգավորմանն ուղղված ռուսական կողմի հետևողական ջանքերին, մեր որոշ ռուս գործընկերներ տառացիորեն երեկ Բաքվում մասնակցել են ընդգծված հակահայկական ուղղվածություն ունեցող ակցիայի, որը հակասում է տարածաշրջանում խաղաղության և կայունության պահպանման ոգուն»,- ասել է նա:

 

Գնահատական տալով Արարատ Միրզոյանի և դեսպանի հայտարարություններին, քաղաքագետը նկատեց՝ վերջիններիս նույնիսկ կոռեկտ են արտահայտվել. «Կարծում եմ՝ ասվել է այն, ինչ պետք է ասվեր ու դա ասվել է բավականին կոռեկտ կերպով։ Արտաքին քաղաքական հարցերում պետք է հստակ արտահայտվել և նման հստակությունը գնահատվում է, ավելին, նման դեպքերում սկսում են երկրին ավելի լուրջ վերաբերվել»,- եզրափակեց Ստեփան Դանիելյանը։