Մարմնամարզության հավաքականի գլխավոր մարզիչը գերազանց է գնահատում Դոհայում ազգային թիմի ելույթը

Մարմնամարզության Հայաստանի տղամարդկանց թիմի գլխավոր մարզիչ Հակոբ Սերոբյանը Դոհայի աշխարհի գավաթի խաղարկությունում ազգային թիմի մասնակցությունը գնահատում է գերազանց:

«Աշխարհի գավաթի այս խաղարկությունը մեզ համար շատ հաջող ստացվեց, և մենք 100 տոկոսանոց արդյունքի հասանք, քանի որ մեր 4 մասնակիցներն էլ դուրս եկան եզրափակիչ: Ոչ մի թիմ նման արդյունք չի գրանցել: Մեզ համար անսպասելի էր եզրափակչում 3 մեդալ նվաճելը: Եթե նման մասնակցություն ունենանք Եվրոպայի առաջնությունում, ապա շատ լավ կլինի»,-լրագրողների հետ հանդիպման ժամանակ ասաց Սերոբյանը:

Խոսելով առանձին մասնակիցների մասին` նա փաստեց, որ հրաշալի հանդես եկավ Արթուր Դավթյանը, ով վնասվածք ուներ, սակայն կարողացավ մեդալ նվաճել: «Մեզ համար կարևոր է նաև այն, որ լավ մասնակցենք Եվրոպայի առաջնությանը, քանի որ այն որակավորում է տալիս Մինսկի եվրոպական խաղերից առաջ»,-ասաց մարզիչը:

Սերոբյանի պնդմամբ` հավաքականը մեծ դժվարությունների է բախվում, քանի որ հավաքական թիմը բժիշկ չունի, և մարզիկները վնասվածքների ժամանակ չգիտեն՝ ինչ անել: «Մի քանի օրից մեկնում ենք Թբիլիսի՝ ուսումնամարզական հավաքի, որին կմասնակցեն նաև երիտասարդ մարմնամարզիկները»,-եզրափակեց մասնագետը:

Հավաքականի մարզիչ Սոս Սարգսյանը ևս գոհունակություն հայտնեց մարզիկների գրանցած արդյունքից և կատարած աշխատանքից՝ շեշտելով, որ մարզիկների ելույթը սպասվածից ավելին էր:

Դոհայում կայացած աշխարհի գավաթի խաղարկության հերթական փուլին Հայաստանի հավաքականը մասնակցել է 4 մարզիկով: Արթուր Դավթյանը հենացատկերի վարժությունում գրավել է երրորդ, Արթուր Թովմասյանը օղակների վարժությունում՝ երկրորդ, իսկ Վահագն Դավթյանը նույն օղակների վարժությունում՝ երրորդ տեղը: Հարություն Մերդինյանը նժույգաթափերի վարժությունում 5-րդն էր: