Չի բացառվում, որ հակառակորդի հետ հնարավոր լինի որևէ հարցում համաձայնության գալ. իմքայլական պատգամավոր

«Փաշինյան-Ալիև հանդիպումը լինելու է ԵԱՀԿ Մինսկի խմբի` այսպես ասած առաջարկով, և վարչապետն արդեն նշել է, որ եթե անգամ հանդիպումը չունենա օրակարգ, այնուամենայնիվ, նման համդիպումներ Ադրբեջանի հետ մեզ պետք են»,-ԼՈւՐԵՐ.com-ի հետ զրույցում ասաց Աժ «Իմ քայլը» խմբակցության պատգամավոր Նարեկ Զեյնալյանը:

Անդրադառնալով հանդիպման անհրաժեշտությանը՝ Զեյնալյանն ասաց. «Նախ վարչապետը ասաց, որ ինչպես միշտ՝ պնդելու է, որ Արցախը ևս ներգրավվի բանակցություններին, բացի այդ, չի բացառվում, որ հակառակորդի հետ հնարավոր լինի որևէ հարցում համաձայնության գալ, որը կնպաստի Արցախյան հարցի ճիշտ լուծմանը բանակցությունների միջոցով»,-ասաց պատգամավորը:

Հարցին, թե արդյո՞ք հնարավոր է Ադրբեջանին բերել բանակցությունների սեղանի շուրջ այն պարագայում, երբ Ադրբեջանն այս ընթացքում զորավարժություններ է անում, փորձում է դիրքեր առաջ բերել և ամրապնդել, սահմանին զոհեր են լինում` Զեյնալյանը պատասխանեց. «Մեր պաշտպանության նախարարը ևս հայտարարել է, որ ադրբեջանական կողմից դիրք առաջ չի բերվել: Ադրբեջանի կողմից արվող հայտարարությունները միշտ լղոզված են և ավելի ճիշտ կլինի, եթե ուշադրություն դարձնենք ներկայացվող փաստերին: Վարչապետն ամեն կերպ փորձելու է և պնդելու է, որ Արցախյան հարցի շուրջ բանակցություններին Արցախն անպայման ներգրավվի»,-ընդգծեց Նարեկ Զեյնալյանը:

Խոսելով Աննա Հակոբյանի` ադրբեջանական բանակի զինվորների մայրերին խաղաղության կոչի և նրանց կողմից տրված պատասխանի մասին, Նարեկ Զեյնալյանն ընդգծեց. «Աննա Հակոբյանը հստակ կոչ է արել խաղաղության: Նրա քայլը պատերազմին վերջ դնելու և խաղաղ պայմաններում համաձայնության գալու կոչ է եղել և դա գնահատելի է: Ինչ վերաբերում է ադրբեջանցի մայրերի պատասխանին, ես չեմ կարող որևէ կերպ մեկնաբանել դա, որովհետև նրանք հաճախ տրամաբանությունից զուրկ քայլեր են անում»,-ասաց նա:

Հիշեցնենք, որ «Կանայք հանուն խաղաղության» նախաձեռնության շրջանակներում Աննա Հակոբյանի ուղեկցությամբ Արցախում էին Ռուսաստանի հասարակական, քաղաքական, գրական, մեդիա ոլորտների գործիչներ։ Նրանք մեկնել են առաջնագիծ, որտեղ խաղաղության իրենց ուղերձն էին հղել հակամարտության կողմերին։ Ադրբեջանի պատասխանը չուշացավ` ադրբեջանական մամուլը հրապարակեց լուսանկար` ադրբեջանցի մայրերը՝ զենքերը ձեռքներին բռնած:

Սիլվի ՏԻԳՐԱՆՅԱՆ