ԱԺ պատգամավորներն ու սպառողական վարկերը. ով ինչ է գնել ապառիկով

«Մեր տանը ինչ կա՝ լվացքի մեքենա, սառնարան և այլն, ամեն ինչ վարկով ենք առել: Շատ հարմար վարկեր են առաջարկվում, ամիսը 6000 վճարելով՝ ձեռք ես բերում լվացքի մեքենա, ինչի՞ միանգամից 300 հազար տաս, եթե կա այդ տարբերակը: Եթե չեմ սխալվում, մեր լվացքի մեքենայի վարկը մինչև հիմա չենք վերջացրել, մի 4 տարի առաջ ենք առել»,-այս մասին Աժ նիստի ընթացքում հայտարարեց վարչապետ Նիկոլ Փաշինյանը` խոսելով սպառողական վարկերի մասին:

Վարչապետի հայտարարությունից անմիջապես հետո Աժ նախագահ Արարատ Միրզոյանը ասաց, որ օրեր առաջ ցանկացել է ապառիկով հեռուստացույց գնել, բայց պարզվել է, որ հարկադիրն իր հաշվի վրա կալանք է դրել: ԼՈւՐԵՐ.com-ը փորձեց հասկանալ, թե Աժ պատգամավորների մեջ կա՞ն սպառողական վարկերից օգտվողներ, արդյո՞ք հասցրել են խնդիրներ ունենալ այդ համակարգում և որքանո՞վ են շահավետ համարում վարչապետի առաջարկը սպառողական վարկերից օգտվելու վերաբերյալ:

«Ես երբևէ չեմ օգտվել սպառողական վարկերից, բայց կարծում եմ, որ երբ կանխիկ գնելու հնարավորություն չունի մարդը, նրան միշտ օգնության է գալիս ապառիկը, որը գուցե և մի փոքր թանկ է ստացվում»,-ասաց «Իմ քայլը» խմբակցության պատգամավորներից Հերիքնազ Տիգրանյանը:

Սփյուռքի նախկին նախարար, իմքայլական պատգամավոր Մխիթար Հայրապետյանը վարչապետի առաջարկը չցանկացավ մեկնաբանել. «Ես չեմ գնել ոչ մի բան ապառիկով, իսկ վարչապետի ելույթին և առաջարկին մեկնաբանություն չեմ ուզում տալ»:

«Իմ քայլը» խմբակցության պատգամավոր Արեն Մկրտչյանը նշեց, որ ինքն էլ Աժ նախագահ Արարատ Միրզոյանի պես հեռուստացույց է փորձել գնել ապառիկով. «Ես հեռուստացույց եմ գնել ապառիկով, ուշացումներ ունեմ, բայց կալանքի տակ չեմ հայտնվել: Միանշանակ, վարչապետի կողմից արված առաջարկը` սպառողական վարկերից օգտվելու վերաբերյալ, կարող է նպաստել տնտեսության զարգացմանը: Դա ամբողջ աշխարհում տենդենց է, եկամուտների և ծախսերի բավականին բալանսավորված գործիք է: Տոկոսների՝ երբեմն բարձր լինելու ուղղությամբ Կնետրոնական բանկը, բնականաբար, աշխատելու տեղ ունի և աշխատում է»,-ասաց Արեն Մկրտչյանը:

Իմքայլական Հովհաննես Իգիթյանը նշեց, որ փոքր տարիքից սպառողական վարկով որևէ կենցաղային ապրանք գնելու կարիք չի ունեցել. «Երևէ ամեն ընտանիք ինքը գիտի՝ ինչպես գնի, ես միշտ կանխիկի հնարավորություն ունեցել եմ և եղել եմ բարձր վարձատրվող փորձագետ: Եթե կարիքը ունենայի՝ իհարկե կօգտվեի ապառիկի հնարավորությունից: Եթե մարդը ծախսում է ավելի շատ, քան ինքը վաստակում է՝ մակրոէկոնոմիկայի տեսանկյունից դա նպաստավոր է, իսկ եթե մարդը կարողանում է հետագայում ձեռք բերել այնքան գումար, որ կարողանա փակել իր վարկը և տոկոսները, դա արդեն իդեալական է»:

«Լուսավոր Հայաստան» խմբակցության պատգամավոր Անի Սամսոնյանը հիշեց, որ տարիներ առաջ սպառողական վարկից օգտվել է. «Հեռախոս եմ գնել, ուշացումներ ունեցել եմ, բայց կալանք չի եղել: Ես կարծում եմ, որ շատ սուբյեկտիվ որոշում է՝ օգտվել սպառողական վարկերից, թե՝ ոչ: Ես ունեմ ծանոթներ, ովքեր ունեն կանխիկով գնելու հնարավորություն, բայց դիմում են ապառիկի տարբերակին, որովհետև մաս-մաս վճարելը շատ ավելի հարմար է, ընտանելան բյուջեից միանգամից մեծ գումար չես կորցնում: Բարձր տոկոսները, իհարկե, խնդիր են, դրանք չենք բացառում»,-նշեց պատգամավորը:

Սիլվի ՏԻԳՐԱՆՅԱՆ