Ինչու է Աննա Հակոբյանը մեկնելու ԱՄՆ և այս անգամ ով է հոգալու ծախսերը

Այսօր հայտնի դարձավ, որ ապրիլի 8-ին, Լոս Անջելեսում ՀՀ գլխվոր հյուպատոսությունը և Գլենդեյլի քաղաքապետարանը կազմակերպել են հանրային հանդիպում ՀՀ վարչապետ Նիկոլ Փաշինյանի տիկին Աննա Հակոբյանի հետ։ Միջոցառման վերաբերյալ առավել մանրասն տեղեկություններ ստանալու համար ԼՈւՐԵՐ․com—ը կապ հաստատեց Աննա Հակոբյանի մամուլի խոսնակ Հասմիկ Հարությունյանի հետ։

Նա նշեց, որ ՀՀ վարչապետի տիկին, «Իմ քայլը» և «City of smile ժպիտների քաղաք» բարեգործական հիմնադրամների հոգաբարձուների խորհրդի նախագահ Աննա Հակոբյանը Ամերիկայի Միացյալ նահանգներ կմեկնի ապրիլի 1-ին․ «Այցի ընթացքում Աննա Հակոբյանին ուղեկցելու են «Իմ քայլը» բարեգործական հիմնադրամի գործադիր տնօրեն Հովհաննես Ղազարյանն ու «City of smile ժպիտների քաղաք» բարեգործական հիմնադրամի գործադիր տնօրեն Էսթեր Դեմիրճյանը: Նախատեսվում է Աննա Հակոբյանի այցը ԱՄՆ Կոնգրեսի գրադարան և հանդիպում կին կոնգրեսականների հետ: Աննա Հակոբյանը «Կանայք հանուն խաղաղության» արշավի շրջանակում հանդիպում կունենա Կարնեգի հիմնադրամում: Նա կմասնակցի Լոս Անջելեսում Հայաստանի հյուպատոսության 25-ամյակին նվիրված միջոցառմանը: Այցի շրջանակում կմասնակցի նաև բարեգործական մի շարք ընթրիքների, կունենա երկկողմ հանդիպումներ, որտեղ կներկայացնի երկու հիմնադրամների գործունեությունն ու ծրագրերը»,- ասաց Հարությունյանը:

Խոսնակի փոխանմամբ՝ Աննա Հակոբյանը կայցելի նաև Մեմֆիս քաղաքի Սուրբ Հուդայի անվան հիվանդանոց, որտեղ կստորագրվի հուշագիր ST Jude (Սուրբ Հուդայի) մանկական հետազոտական հիվանդանոցի, Հայաստանի մանկական քաղցկեղի և արյան հիվանդությունների կենտրոնի և  «City of smile ժպիտների քաղաք» բարեգործական հիմնադրամի միջև:

Թե ո՞վ է հոգալու ծախսերը՝ հարցին ի պատասխան Հարությունյանն ասաց․ «Հիմնադրամները, քանի որ տիկին Հակոբյանը մեկնում է որպես հիմնադրամների հոգաբարձուների խորհրդի նախագահ»,- նշեց նա։ 

Նշենք, որ վերջին շրջանում անընդհատ քննարկվում են Աննա Հակոբյանի գործուղումներն ու վարչապետ ամուսնու հետ արտերկրյա աշխատանքային այցերին մասնակցելը։ Մասնավորապես, բուռն քննադատությունների առիթ էր տվել, երբ վարչապետ Նիկոլ Փաշինյանը երկօրյա աշխատանքային այցով Բելգիայի Թագավորություն էր մեկնել կնոջ և դստեր՝ Մարիամ Փաշինյանի հետ։

Բրյուսելի փողոցում քայլելիս Աննա Հակոբյանն ու դուստրը դեմ դիմաց հանդիպել էին Հայաստանի պատվիրակության կազմում Բելգիա ժամանած լրագրողների խմբին և ինչպես վերջիններս էին պնդում՝ շրջել գլուխը։ Թեև սրան անդրադարձավ հենց Հակոբյանը՝ փորձելով փակել թեման, սակայն այդպես էլ չհաջողվեց։ Ավելին, այդ մասին հարցեր հնչեցին նաև վարչապետին, նրա՝ 4 ժամից ավել տևած մամուլի ասուլիսի ժամանակ։

Սոնա Հարությունյան