Բանակում սպանությունները ճակատագիր են. իմքայլական պատգամավոր

Հեղափոխությունից հետո սահմանին համեմատաբար անդորր է տիրում, բայց այս ընթացքում էլ շարունակում ենք դեռ բանակից գուժ ստանալ: Ծառայակցի կողմից զինվորի սպանության լուր այսօր ևս տարածվեց, օրերս էլ Մեղրիում էր միջադեպ տեղի ունեցել, որտեղ զինվորները անհնազանդություն էին դրսևորել և գողական վարքագիծ էին փորձել թելադրել: Ի՞նչ էր սա, արդյոք իրավիճակը խոսում է բանակում բարձիթողի վիճակի մասին

Այս թեմայի շուրջ ԼՈՒՐԵՐ.com-ը զրուցել է Աժ Իմ քայլը խմբակցության պատգամավոր Վահագն Հովակիմյանի հետ։

«Դա չենք կարող կապել վերահսկողության հետ, որովհետև հիմա այդ վերահսկողությունն ավելի խիստ ձևով է կատարվում։ Որևէ հստակ մեկնաբանություն չեմ կարող տալ, բայց պետք է հասկանալ, որ դա բազմահազարանոց կառույց է և հնարավոր են նաև նման դեպքեր։ Կարևորն այն է, որ խնդիրները բացահայտվեն և ճիշտ եղանակով լուծվեն։ Եթե մի հարցի շուրջ մեղավորություն ունի հրամանատարը, թող նա ենթարկվի պատասխանատվության։ Բնական է այս դեպքերն անչափ ցավալի են, բայց հրամ կազմը հաստատ հետևություններ անում է։ Եթե նայենք աշխարհի ամենակայացած բանակ ունեցող երկրների ցուցանիշներին, ամեն դեպքում այնտեղ էլ, նման դեպքեր լինում են։ Չեմ ընդունում, որ նման դեպքերի աճը կապված է որևէ տրամադրությունների հետ, կարելի է ասել դա ճակատագիր է»։

Վահագն Հովակիմյանը խուսափեց մեկնաբանել Մեղրիի զորամասում տեղի ունեցած դեպքերը։ Պատգամավորը շեշտեց, որ հարուցված քրեական գործերը կբացահայտեն մեղավորներին։

«Իմ կարծիքով այս դեպքերը կապ չունեն նախկին բարքերի հետ, նոր իրողության ժամանակ խնդիր է դրված զինվորների հարաբերություններում առկա բարքերը արմատախիլ արվեն և արվել են։ Բայց բնական է, որ երբեմն կարող են թերացումներ և բացթողումներ լինեն»։

Պատգամավորը նշեց, որ նման դեպքերում խնդիրների բացահայտումն ու համապատասխան մեղավորների պատասխանատվության ենթարկելը հնարավորություն կտա նվազեցնել նման դեպքերի հետագա կրկնությունը։