Թեղուտը կշահագործվի, այլապես պետությունը լուրջ խնդիրներ կունենա․ Արեն Մկրտչյան

Այսօր՝ մարտի 27-ին Ազգային ժողովի պատգամավոր Արեն Մկրտչյանը հայտարարել էր, որ առաջիկա օրերում պատրաստվում են հանդիպում կազմակերպել Ալավերդիում, քննարկել Թեղուտի հանքի վերաբացման թեման։ Պատգամավորը թեպետ նշում է, որ հանքը վերագործարկվելու է, սակայն շարունակում է կարծել, որ այն բնապահպանական և սոցիալական աղետ է։ 

Թեմայի շուրջ ԼՈԻՐԵՐ.com-ի թղթակիցը զրուցել է Աժ պատգամավոր Արեն Մկրտչյանի հետ։

«Ալավերդցիների հետ հանդիպման ժամանակ նոր սեփականատերը, ներդնողը պետք է տեղեկացնի, որ մեկնարկում է վերագործարկման պրոցեսը»,- իր խոսքում ասաց պատգամավորը։

Անդրադառնալով Ալավերդու պղնձամոլիբդենային գործարանի վերաբացման հնարավոր լինելուն՝ պատգամավորն ասաց․

«Երկու տարբեր ձեռնարկությունների մասին ենք խոսում, եթե այստեղ հանքը իր պաշարներով ստատիկ սպասում էր վերաբացմանը, ապա այնտեղ լրիվ այլ իրավիճակ է։ Ձուլարանի վերաբացման մասին, ոչինչ ասել չեմ կարող, քանի որ այս պահին որևէ զարգացում չկա։ Այստեղ խոսքը գնում է 630 աշխատողի աշխատատեղի խնդրի մասին, բայց միևնույն ժամանակ կար նաև էկոլոգիական աղետալի վիճակ։ Արտանետումների սահմանչափը գերազանցվում էր 7 անգամ, եթե նույնիսկ ձուլարանը վերաբացվի, այն չի կարող գործել նախկինի նման։ Ընդհանուր, տարածաշրջանում կա տնտեսության կառուցվածքը փոխելու խնդիր, այսինքն նոր ներդրումներ ներգրավելու, այլընտրանքային աշխատատեղեր բացելու, որպեսզի թե՛ Ալավերդին, թե՛ հարակից բնակավայրերը կախված չլինեն մեկ տնտեսվարողից»։

Նշենք նաև, որ Ֆեյսբուքյան գրառումից հետո օգտատերերի մոտ քննարկման առարկա էր դարձել այն, որ Թեղուտի հանքի վերաբացվելը խոսում է նրա մասին, որ նոր հանքեր են բացվելու նաև Տավուշում։

Անհանգստացնող թեմայի մասին խոսելով՝ Արեն Մկրտչյանն ասաց, որ երկու թեմաները միմյանց հետ որևէ կապ չունեն։ Նա հավելեց․

«Այստեղ խոսվում է արդեն մեկ անգամ շահագործված  հանքի մասին։ Թույլտվություն ունեցող, հսկայական պոչամբար կուտակած ընկերության և կոնկրետ սեփականատեր ունեցող ընկերության մասին է խոսքը։ Իսկ երկրորդ պարագայում կառավարությունը կարող է հանք շահագործելու թույլտվություն տալ կամ չտալ։ Սա արդեն կառավարության խնդիրն է և կառավարությունն իր առաջնահերթությունները սահմանել է։ Թեղուտի դեպքում թույլտվությունը ժամանակին տվողները տվել են։

Ի դեմս Թեղուտի՝ շատ ծանր ժառանգություն ենք ստացել, ես սա բացեիբաց և հստակ կարող եմ ասել։ Այո՛, այդ հսկայական պոչամբարը մեզ համար նույնպես անընդունելի է։ Բայց հանքը ունի սեփականատեր, բանկը վարկ է տրամադրել, որը հետ չեն տվել։ Բանկը պետք է փորձի հետ ստանալ այդ գումարը, իսկ դա պետք է արվի շահագործման միջոցով։ Հակառակ գործողությունները կարող են պետությանը լուրջ խնդիրների առջև կանգնեցնել»։

Պատգամավորը շեշտեց, որ եթե պետությունը փորձի միջամտել, սեփականատերը կարող է եվրոպական ատյաններում խոսեն պետության դեմ։

Ասպրամ Փարսադանյան