Ինչպես մարդիկ ընդունեցին ապառիկի մասին մանր սուտը

Այսօրվա թոփ թեման վարչապետ Նիկոլ Փաշինյանի և Աժ նախագահ Արարատ Միրզոյանի Ազգային ժողովի ամբիոնից հնչեցրած հայտարարություններն են՝ վարկով վերցրած լվացքի մեքենայի, սառնարանի, հեռուստացույց վերցնել չհաջողելու վերաբերյալ:

Բանն այն է, որ անդրադառնալով սպառողական վարկերի ավելացման հարցին՝ Փաշինյանն իր վարկային պարտավորություններն է հիշել. «Օրինակ, ես հիմա մտածում էի, որ մեր տանը ինչ կա լվացքի մեքենա, սառնարան և այլն, ամեն ինչ մենք վարկով ենք առել, որովհետև շատ հարմար վարկեր են առաջարկում… եթե չեմ սխալվում՝ մեր լվացքի մեքենայի վարկը մինչև հիմա դեռ չենք վերջացրել, մի 4 տարի առաջ ենք գնել»,– ժպիտով ասաց Փաշինյանը։

Արձագանքելով վարչապետի խոսքին՝ Արարատ Միրզոյանը ժպիտով պատմել է, որ օրեր առաջ գնացել է վարկով հեռուստացույց վերցնելու, չեն տվել, քանի որ ԴԱՀԿ-ն կալանք է դրել իր հաշվի վրա։

Վարչապետի ու ԱԺ նախագահի այսօրվա ելույթները համացանցում ծաղրի առարկա են դարձել: Անդրադառնալով դրանց՝ Միրզոյանի կինը՝ Գոհար Աբաջյանը գրառում է կատարել, թե երբ ամուսինը ԶիգԶագից զանգել ու ասել է՝ ապառիկ չեն տալիս, մի լավ ծիծաղել է: Այնուհետև մեկնաբանություններում օգտատերերից մեկի հարցին, թե հիմա հեռուստացույց չունե՞ն, ի պատասխան Աբաջյանը գրել է՝ «անկեղծ՝ դեռ ոչ»: 

Սրանից հետո քննարկումներ ավելի մեծ թափ հավաքեցին և համացանցում սկսեց շրջանառվել Արարատ Միրզոյանի լուսանկարը, որտեղ նա փոշեկուլով հատակն է մաքրում, իսկ հետևում երևում է հարթ էկրանով ժամանակակից հեռուստացույցը: Օգտատերերի մոտ հարց է առաջանում՝ ո՞ւմ տունն է մաքրում ԱԺ նախագահը:

Ի դեպ, օգտատերերի համար զավեշտալի է հատկապես այն, որ ԶիգԶագը պատկանում է Կառավարության աշխատակազմի ղեկավար Էդուարդ Աղաջանյանի ընտանիքին և ուրեմն նոր Հայաստանում՝ պաշտոնյաները միմյանց «պոդերժկա» չեն անում:

Ստորև ներկայացնում ենք փոքրիկ քաղվածք համացանցից, թե ինչպես են մարդիկ ծաղրում երկրի դեմքերի խոսքը և այդ առթիվ հումորներ անում: